Сумар дня на 14. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 14. лютого/фебруара 2023 р.

Тырват ремонт даху церкви в Лабовій

Понад 200-літній храм Покровы Пресвятой Богородиці в Лабовій од долшого часу потрібувал ремонту, єднак його кошт был за великій. Проєкт удало ся зреализувати завдякы єдному з найменшых в Польщы ґатунків мышпергачів – підковоносови малому, котрый має своє літнє становиско на поді в обєкті. Зато же єст то ґатунок під охороном, ремонтом даху заняла ся Реґіональна Дирекция Охороны Середовиска в Кракові в рамках проєкту «Хіроксеро», котрого цілю єст поправа обставин прожываня мышпергачів. Як підкрислил духовный, котрый опікує ся святыньом в Лабовій, ратуваны сут не лем мышпергачы, але тіж памят о Лемках, котры прожывали в Лабовій. Уж тепер выміняют дах на мідяный і адаптуют поміщыня на поді під мышпергачів, м.ін. монтуют специяльны буды ци каналы до безпечного перелітуваня. Ремонт закінчыт ся до кінця марця, товды то мышпергачы вернут на під храму.

Мобільный музей істориі Жыдів в Ґорлицях

До Ґорлиц зас пириіхат музей на колесах. Од 27. до 29. червця/юнія в місті стоял буде павілон з мобільном едукацийном выставом на тему Жыдів. Проєкт, як і выстава реализувана єст Музейом Істориі Польскых Жыдів ПОЛІН. Ґорлиці сут єдным з 10 міст в цілій державі, в котрым затримат ся павілон. Цілю проєкту єст приближыти історию Жыдів при выкорыстаню модерных форм музею, котрый приходит до люди. Головным пунктом выставы буде інтерактивна мапа з зазначеныма місцями звязаныма з історийом і реліґійом Жыдів. Што цікаве, мапа змінят ся в залежности од того, де актуальні находит ся музей на колесах, так же зазначены місця односят ся до конкретных реґіонів. Выстава не ограничат ся єднак лем до мапы. Для наймолодшых зрыхтувано варштатовый стіл, при котрым діти будут мочы познати юдаіку. Додатково в каждым місци, де заіхат музей, будут орґанізуваны товаришучы подіі, м.ін. едикацийны прогулькы ци містецкы гры.

Єден з найстаршых храмів на Підкарпатю потрібує реновациі

Грекокатолицка парохія в Хотинци глядат фінансовой підпоры на наступны реновацийны роботы при забытковым іконостасі в місцевій церкви. Святыня Різдва Пресвятой Богородиці в Хотинци єст єдном з найціннійшых і найстаршых сакральных будовлі на Підкарпатю. Побудувана была в 1615 році і служыт аж до днес. Найблизша консервация тыкала буде ікон, з котрых зачынат сходити фарба. Треба як найскорше забезпечыти творы, жебы не допустити до дальшой деґрадациі. Парохія рахує, што кошт прац вынесе коло 160 тис. зл. О дофінансуваня парохія выступила до воєвідского консерватора забытків та самоуряду Підкарпатского воєвідства.

В Радоцині видно уж першы ефекты будовы Екопарку Радоцина

Проєкт Державных Лісів та Нацийонального Фонду Охороны Середовиска закладат будову Екопарку Радоцина- цілого комплексу, в котрым мож буде вести еколоґічну едикацию при выкорыстаню натуральных ресурсів реґіону. Екопарк буде ся складал зо шытрьох части: головной, охороны повітря, інтерактивного парку і базы «за водом». Актуально працы ведены сут головні в двох першых частях. Стоіт уж новый будинок в центральній части парку і єст місце туристичной інформациі. На обшыри парку найде ся тіж едикацийна колиба стилизувана на лемківску хыжу. Як заповідат Надлісництво Ґорлиці, завдякы тырваючым уж працам онедолга мож буде одвидити нову Радоцину.

фот. Henryk Bielamowicz