Світовый конґрес Русинів має одбыти ся в другій половині авґуста

17-ый Світовый конґрес Русинів (СКР) бы мав проходити в днях 17-го аж 19-го авґуста 2023-го року в сербскім Новім Саді. Як інформовала аґентура Рутенпрес, адміністратівне одділіня общества Руска матка, котре тот рік конґрес орґанізує, о тім вырішыло на своїм засіданю в пятніцю 3-го фебруара.

На робочій стрічі, котру вів председа общества Руска матка, членьской орґанізації СКР за Сербію, Михайло Фейса, быв обговореный проґрам конґресу, котрый буде святочно одкрытый у фоає Сербского народного театру в Новім Саді выставов і културным проґрамом.

Другый і третій день конґресу, в рамках котрых будуть проходити пленарны засіданя і засіданя конґресовых комісій, буде проходити на Філозофічній факулті Новосадьской універзіты. Фейса на стрічі бісідовав о тім, же мають замір выдати з конґресу науковый зборник і книжку австрактів.

Наплановану дату проходжіня СКР іщі потвердять на кінцю фебруара, коли бы мало проходити і засіданя Світовой рады Русинів.

День скоріше в просторах общества Руска матка бісідовав председа Фейса з директором Заводу про културу войводиньскых Русинів Сашом Сабадашом о фінанцованю СКР. Кедьже очекує ся коло 160 делеґатів і гостів, фінанцованя є найвекшов проблемов такой великой події.

Сабадош запропоновав Фейсови подати проєкт до конкурзу о фінанчны средства, котрый Завод про културу войводиньскых Русинів выпише в марці.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА