Сумар дня на 6. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 6. лютого/фебруара 2023 р.

Украінскій закон о нацийональных меншынах проанализує Венецийска Комісия

Венецийска Комісия, порадный орґан Рады Европы, слідуючых пят місяців буде анализувала украіньскій закон о нацийональных меншынах, котрый Верховна Рада приняла 13. грудня/децембра минулого рока. На жаданя ведучого Моніторінґового Комітету Парляментарного Згромаджыня Рады Европы з 30. січня/януара тр. Венецийска Комісия зрыхтує становиско што до реченого закону. Нацийональный закон є медже семома рекомендациями Европейской Комісиі, котры Украіна повинна сполнити, жебы могли дальше іти єднаня о вступі до Европской Уніі. За рекомендациями Европейской Комісиі, закон має взяти до увагы припоминкы Венецийской Комісиі. Єднак Украіна не звертала ся до Комісиі з жаданьом о проанализуваня пропозициі закону перед тым як был принятый. Дрібниці чытайте на нашым портали.

Карпатска писанка 2023

Выголошеный был 31. річник медженародного конкурсу і выставы Карпатска писанка 2023. Орґанізатором є Выгорлятскій Музей в Гуменным. Того рока честным гостьом буде Музей Писанок в Коломыі на Украіні, єдиный того рода на світі. В рамках Карпатской Писанкы каждого рока презентуваных є близко 1000 писанок з ріжных держав Европы. Подія має презентувати заховуваня культурного богатства карпатского реґіону. Зголосити ся можут авторы писанок без віковых ограничынь, не лем зо Словациі. До 1. марця треба прислати максимально 10 фалатків зробленых буд-яком техніком. Оцініня і святочне переданя нагорід одбуде ся в рамках одкрытя выставы 16. марця в концертовій сали Выгорлятского Музею. Писанкы буде мож пак обзерати до 30. квітня/апріля в Ґалерийній сали Ореста Дубая.

«Новосільскій. В сотну річницю народин»

Фурт являют ся дальшы подіі припоминаючы 100. річницю народин Юрия Новосільского, вызначного артисты лемківского походжына, філософа і православного теолоґа. Припомнийме, што Сойм Польской Республикы свхалил 2023 рік Роком Юрия Новосільского. На 14. квітня/апріля Нацийональный Музей в Кракові заплянувал одкрытя выставы пн. «Новосільскій. В сотну річницю народин». На експозициі будут ся находити творы з власной колекциі музею, м.ін. портреты і акты, краєвиды, абстракциі, та вельоформатовый твір «Villa dei misteri» – інспіруваный помпейскыма фресками. Творы Новосільского мож обзерати іщы до 26. лютого/фебруара в Бєльскій Ґалериі БВА, разом з творчістю Станіслава Нємчыка на выставі пн. «Стріча». Аж в маю завершыт ся выстава пн. «Працовня Юрия Новосільского» в Ґалериі Стармах в Кракові та експозиция памяткок по артисті і єдного з його автопортретів, якы сут презентуваы в Палаци Кжыштофоры. Такой цілый 2023 рік, бо аж до 19. грудня/децембра, мож буде обзерати іконы написаны Новосільскым ци запсаный артистом порядок літургічных молитв, якы ся находят на часовій выставі в Музею Ікон в Супрашли.

ІІІ Европейскій Біговый Фестіваль – Два Бескіды

В Креници в днях од 30. червця/юнія до 2. липця/юлия буде проходила третя едиция Европейского Бігового Фестівалю – Два Бескіды. В тым самым часі в Креници будут ся одбывати змаганя в рамках ІІІ Европейскых Ігр, зато в тым році базом для Фестівалю буде поляна Янівка. Як обіцюют орґанізаторы – більше дрібниц і записы уж неодолга.