«Слово» – Неділя мытаря і фарізея – неділя, 9.00 год.

Перша неділя, котра нас приготовлять на вступ до святого посту є Неділя мытаря і фарізея. Ісус Хрістос говорить образный приклад о двох людях, котры вошли до церькви, жебы помолити ся.

Єден фарізей, і другый мытарь. Фарізей свідомый собі свойой надуманой справедливости, стояв цалком впереді і дяковав, же не є як іншы, же ся постить і давать десяткы. Но і на тім ціла його духовность скінчіла. Не потребовав Бога, не потребовав одпущіня, не потребовав ани іншых людей, бо вшыткы были з його погляду ниже нього. Видиме як пыха піднимать надутостьов чоловіка, жебы зошмарити великов силов до пропасти.

Мытарь стояв взаду, очі мав ку землі, а молився сердцьом горі піднятым: Боже, будь милостивый мі грішному. А хоць быв собі свідомый свойой грішности і недостойности, з глубины понижености од гріха кличе ку Богу. А Ісус говорить, же тот одышов оправданый.

Пыха недоволює думати на свої хыбы, але видить іншых. Не чує в собі потребу покаяня, не хоче признати собі гріхы, а так не потребує Бога, котрый давать одпущіня. Покора собі усвідомлює свою грішность, пониженость, чує потребу Бога, признавать ся ку свойому гріху, а приїмать одпущіня.

Так нам Церьков указує якым злом є пыха, коли овладне душу чоловіка, зверьгує до пропасти, а тыж як покора піднимать з пропасти ку небу. Наслідуйме приклад покоры мытаря і уникайме прикладу пыхы фарізея. Слава Ісусу Хрісту!

В неділю, 5. фебруара 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 5. фебруара 2023 р. о 12.00 год. і 6. фебруара 2023 р. о 2.00 год. за русиньскым часом.