Новости скансену в Саноку з новым директором

Марцін Кровяк, історик і музейник, зачынал професийну карєру як провідник по саноцкым скансені. Пак был асистентом, адюнктом і кустошом. Од місяця веде Музей Народного Будівництва в Саноку.

«Ціла моя карєра є звязана з том інституцийом. Попередній директор, Єжы Ґінальскій, был моім мастером і ментором. Вельо єм ся од него навчыл» – бесідує Марцін Кровяк, котрый 3. січня/януара обнял становиско директора МНБ в Саноку. Його попередникови заряд воєвідства не продолжыл контракту. Ґінальскій перешол на емеритуру по 23 роках шефуваня в скансені.

Пляны на новый сезон

«Хочу продолжати напрям, котрый вызначыл директор Ґінальскій, і тото, што він зачал» – пояснят М. Кровяк і додає, што як чловек од 20 років звязаный з музейом міг одраз переняти обовязкы, без конечности познаваня інституциі, додатково, як особа знана працівникам.

«Рыхтуєме ся до нового сезону. Мам надію, же не буде гіршый од минулорічного. Приняли сме 130 тис. гости, того рока тіж бы сме хотіли перекрочыти 100 тис. одвиджаючых» – бесідує новый директор.

Продолжаня робіт, в тым при лемківскій хыжы

Того рока гості будут мочы обзерати закінченый пастырскій сектор, што находит ся в тзв. гірскій части скансену. В сусідстві бойківскых загорід стане пару пастырскых колиб. Роботы мают скінчыти іщы перед початком туристичного сезону.

Роботы зачынают при єдній з лемківскых хыж – походячій з Климківкы. Выпосажат єй в ґратя і реквізиты і удоступнят туристам. В плянах є скінчыти розбудову маґазину.

Новый директор подає, што найвекшы інвестициі, такы як Ґалицийскій Рынок, уж закінчены і веце на таку скалю не буде. «Скансен має оркисленый простір. Але дошол нам новый обєкт, хоц не находит ся в скансені. Заряджаме церквом в Улючы, котра є вынятково цінным памятником» – додає М. Кровяк.

З аплікацийом по скансені

Директор хоче дале популяризувати скансен, зато продолжана буде орґанізация цикличных подій. Будут Карпаты Закляты в Дереві, Фольклористичный Ярмак, Квітна Неділя, торгы старых річы. «Хочу підперти нашу едукацийну діяльніст, притягнути іщы веце діти і молодежы. Хочеме быти модерны, рыхтуєме аплікацию, котра уможливит самодільне звиджаня. Провідник з аплікациі буде нас вюл по скансені» – бесідує директор.

Музей не замінит ся єднак в пляцівку з віртуальныма атракциями. Дале буде можливіст стрітити ся з годинаром, аптыкарьом, пекарьом ци кравцьом, котры сут присутны в Ґалицийскым Місточку.