«Слово» – Закхейова неділя – неділя, 9.00 год.

Iсус приходить до Єріхона. Там жыв головный мытарь і великый богач, котрый звав ся Закхей. Він істо чув о Ісусови, тадь лем курто перед тым выздравив сліпого чоловіка перед вступом до міста.

Сам захотів видіти Ісуса. Но быв малого росту, а так не міг його увидіти, коли Ісус буде переходити коло. Но што задумав? Побігнув оперед і вышов на фіґовый стром, там меджі листьом схованый чекав, як Ісус буде переходити.

Но стало ся дашто, што тот Закхей не міг собі припустити ани в найтаємнійшій думці. Ісус пришов ку тому місцю, і закликав Закхея, а говорить йому: Днесь мам быти в твоїм домі.

Тото справды Закхей не чекав, але прияв то з радостьов. Але тоты слова спустили неґатівну реакцію меджі народом, а може скорше представителями його – фарізеями і архієреями. А Ісус на тото вшытко быв тихо. Не говорив нич. А кедь были при домі Закхея, Закхей ся озвав, а выявлять щіре покаяна і приготовленость нагородити шкоду тым, котрых пошкодив, а половину тыж роздати бідным. Аж тогды Ісус ся озвав: Днесь пришло спасіня до того дому.

Ісус хотів быти не лем в його обыстю, але в домі його сердця. А тото є тым словом і про нас. Ісус хоче быти днесь в домі твойого сердця. Але важне є то слово днесь. Покы ся находиш на землі, є актуалне тото днесь. А кедь мы не знаме, як довго ту будеме, то слово резонує і напоминать: днесь, не одкладай приятя небесного гостя, самого Владыку неба і землі на завтра. А кедь так зробиме, тогды і мы учуєме: Днесь пришло спасіня до того дому.

В неділю, 29. януара 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 29. януара 2023 р. о 12.00 год. і 30. януара 2023 р. о 2.00 год. за русиньскым часом.