Сумар дня на 24. січня/януара 2023 р.

Приносиме вам сумар медияльной ґрупы ЛЕМ.фм+ на ден 24. січня/януара 2023 р.

Быти може буде можливіст здавати на матурі еґзамін з нового чужого языка 

Можливіст здавати на матурі од шкільного рока 2025/2026 еґзамін з украіньского языка як чужого новожытного языка закладают проєкты новелизациі розпоряджынь міністра едукациі і наукы. Тепер в ґрупі языків, якы мож здавати на матурі, сут: анґлицкій, французскій, іспаньскій, німецкій, росийскій і італияньскій. Згідні з проєктом ґрупа тота побільшыт ся о украіньскій. Арґументом для такого рішыня має быти наплыв громадян Украіны до Польщы звязаный з воєнныма діянями веденыма на териториі той державы, што може спричыняти звекшене заінтересуваня Поляків культуром і языком сусідів. Актуально матуральный еґзамін з украіньского языка проходит як еґзамін з меншынового языка.

Новосільскій і Нємчык в Бєльскій Ґалериі

До 26. лютого/фебруара тр. мож видіти в Бєльскій Ґалериі БВА выставу творчости Юрия Новосільского – маляря, православного теолоґа, теоретика штукы, і Станіслава Нємчыка – вызначного архітекта. Експозиця «Стріча» презентує м.ін. проєкты поліхроміі Новосільского для тыхиньского костела Святого Духа, што ся находят ся в Містецкым Музею в Тыхах, ци проєкты костелів Нємчыка в формі рисунків ци макєт. Як припомнула кураторка выставы і шефова ґалериі Аґата Смальцеж, запроєктуваный Нємчыком костел в Тыхах то єдна з ікон сучасной сакральной архітектуры і то як раз архітект запросил Новосільского створити поліхромію в храмі. Розпис представлят парудесят сцен, што односят ся до християньской символикы, універсальной, важной так для православной, як і римокатолицкой реліґіі.

В Ліґници молили ся о єдніст

В неділю 22. січня/януара в ліґницкій катедрі служыли екуменічну вечырню під гослом «Робте добро, глядайте справедливости». Од 18. до 25. січня/януара святкуваный єст Тыжден Молитвы о Єдніст Християн. Участ в богослужыню взяли священникы з парохіі свв. Апостолів Петра і Павла, делеґат до справ екуменізму та парох православной парохіі в Ліґници о. Любомир Воргач. Вечырню очелил ліґницкій єпископ Анджей Сємєнєвскій. Як підкреслено в часі богослужыня, християне сут получены віром і тайнами, але з причыны розмаітых нагромадженых в ході істориі ріжниц треба о тоту єдніст ся молити.

Новый помічный єпископ Братиславской Грекокатолицкой Єпархіі

Як поінформувал офіцияльный сайт Святішого Престола, в понедільок 23. cічня/януара папа римскій Франциск выменувал владыку Міляна Лаха, дотеперішнього єпарху в Пармі, за помічного єпископа Братиславской Грекокатолицкой Єпархіі. Владыка Мілян, котрый уж был помічным єпископом в Пряшові, стал титулярьным єпископом остракіньскым. Мілян Лах має русиньскє походжыня, што уж не раз підкрислял в медиях. Підпорил тіж русиньску кампанію перед повселюдным списуваньом жытелів в 2021 р. на Словациі.

В Устю Рускым будут помагати колядуваньом

Ґмінный Осередок Культуры в Устю Рускым просит на спільне, польско-лемківскє колядуваня в рамках 31. Фіналу Великой Оркєстры Святочной Допомогы. Подія пройде в найблизшу неділю, 29. січня/януара о 16.00 год. в шкільній авли. Участ в колядуваню возмут Юлия Дошна з Мирославом Боґоньом, Ґалицийскій Хор, Дута Оркєстра з Брунар і Театральна Ґрупа Племя.