«Слово» – Праздник Богоявленія – неділя, 9.00 год.

Другым великым праздником нашого церьковного рока є праздник Богоявленія. Євангеліє нам говорить: Пришов Ісус із Ґалілеї, з міста Назарета ку Йордану за Йоаном, жебы ся дав покрестити.

Але Йоан Не хотів і говорив: тадь я ся мам дати тобі крестити, а не ты приходиш ку мі. Йоан перед тым, як Ісус пришов, з надхненя Святого Духа высоко говорив о Хрістови. Говорив, же приходить міцнішый, котрому Йоан недостойный розвязати ремінці на сандалах. Він є тот, котрый позберать пшеніцю до свого сыпанця а полову спалить в неугасаючім огню. Він буде крестити Святым Духом і огньом.

А коли Йоан такыма словами прославляв Ісуса, Ісус стоїть перед ним. Йоан є зачудованый і перестрашеный. Але Ісус йому говорить: охаб так теперь. Охаб высокы бісіды о мі. Теперь на то не є час. І то буде, як прийде час. Теперь треба зробити, што наказую. А так Йоан го покрестив. А отворило ся небо, Святый Дух сходить в подобі голуба а з неба зазвучав голос: Тото є мій прелюбый Сын, в котрім я мам залюбліня.

Святый Дух сходить в подобі голуба, указуючі на подію потопы світа. Коли перестала очіста, а Ной выпустив голуба, тот ся вернув зо зеленов голузков. То быв знак, же воды опали, а зачінать на землі новый жывот. Так і ту приходить Святый Дух такым способом, но без зеленой голузкы. Бо указаує на Хріста, через котрого прийде новый жывот. Він сам возьме гріхы на себе і потопить їх, а дасть вічный жывот вшыткым, котры увірять в Нього.

А тоты слова зазвучали і над нами в часі нашого крещіня. Кедь сьме вьдно з Хрістом были занурены, жебы зачати жыти новым жывотом. Отворило ся і нам небо. Жебы жыти не про землю, про земны роскошы, але про небо. Жебы і в годині смерти зазвучав над нами тот голос: Тото є моя люба дітина, в котрій єм мав залюбліня, подь а перебывай в моїм царьстві на вікы. Хрістос раждається!

В неділю, 22. януара 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. януара 2023 р. о 12.00 год. і 23. януара 2023 р. о 2.00 год. за русиньскым часом.