Сумар дня на 18. січня/януара 2023 р.

Приносиме вам сумар медияльной ґрупы ЛЕМ.фм+ на ден 18. січня/януара 2023 р.

Ден Русинів Сербіі празднуют по цілій Войводинi

Вчера проходил Ден Русинів Сербіі. Русины з Бачкы празднували своє свято того дня в парох місцях, м.ін. в Дюрдьові, Господинцях, Шыді, Сримскій Митровици, Новым Саді ци в Суботици. Дальшы святкуваня проходят днес в Кули, Бачынцях і продолжати іх будут іщы в четвер в Бікічы і в пятницю в Рускым Керестурі. Центральны святкуваня Дня Русинів Сербіі пройдут в суботу 21. січня/януара в Коцурі і в Вербасі. В проґрамі є архієрейска літургія, одркытя выставы пн. «Сліды за памят» (Шліди за паметанє), Етно столы та святочна академія. Част святкувань пройде іщы додатково 3. лютого/фебруара в Вербасі. Русиньска меншына в Сербіі чыслит, подля спсисуваня з 2011 рока (результатів за посліднє списуваня іщы неє), коло 14 тис. 200 осіб. Для порівнаня – в Польщы лемківску нацийональніст подля спису з 2011 рока подало близко 10 тис. осіб, а святкуваня Дня Русинів Польщы проходит переважно лем в Ґорлицях в Рускій Бурсі. Мале одзначыня того дня роблят іщы члены Кружка Ствоваришыня Лемків в Любіні.

Аліна Паш зас на Music Moves Europe Awards

Етно-фольк раперка і гіп-гоперка з Підкарпатя Аліна Паш была выбрана ведучом музичной преміі Music Moves Europe Awards. Артистка поінформувала о тым на своім офіцийным інстаґрамовым профіли. Нагорода Music Moves Europe Awards то нова медженародна премія Европейской Уніі про молодых артистів, котры презентуют сучасне та будуче звучаня Европы. Сама Паш є минулорічном лавреатком той нагороды. Аліна Паш, яка вродила ся в селі Буштино на Тячівщыні, од наймолодшых років брала участ в розмаітых музичных украіньскых і медженародных фестівалях і талент-шоу. Переломным для єй карєры вказал ся дебютантскій сінґєль Bitanga з 2018 р. – композиция лучыт в собі гіп-гоп, русиньскій язык, елементы pop music і карпатскы етно мотивы. Од того часу Аліна Паш активні выступує на сценах Украіны і поза єй границями та спілпрацує з артистами світового рівня.

Ци і коли верне желізницьове получыня Ясло-Сторожы?

В понедільок 16. січня/януара в Повітовым Старостві в Ґорлицях прошла робоча стріча в справі приверніня желізницьовых получынь на трасі Ясло-Сторожы. В стрічы участ взяли самоурядовці з обшыри ясельского і ґорлицкого повітів. Тема была уж близка реализациі, але два рокы тому вшытко перекрислила пандемія. Тепер рыхтуваны сут пропозициі розкладу іды, а згідні з заложынями потяг реляциі Ясло-Сторожы мал бы ся затримувати на вшыткых стациях злокализуваных при трасі, м.ін. в Бічы ци Ґорлицях-Заґужанах. В справу заанґажуваных єст парунадцет самоурядів, котры мают влучыти ся в частичне спілфінансуваня получынь. Коли вступный розклад буде уложеный, представлят го властям малопольского і підкарпатского воєвідств.

Побудуют получыня з дорогом С19 (S19)

Близко 2 км буде мала нова, важна дорога, котру побудуют в Коросні. Получыт она єдну з улиц міста з узлом плянуваной експресовой дорогы С19 (S19). Буде вела рыхтуваном інвестицийном стрефом, одтале єй економічне значыня. Перед двома тыжнями самоуряд міста підписал догваріня з выконавцьом на будову дорогы. Нова траса, презначена до тяжкого руху, буде дорогом з єдным шляком руху з двома пасами по 3,5 метра. Побудуют тіж ходникы і роверовы стежкы. Выконавця мусит заняти ся тіж пристосуваньом терену. Інвестиция зачне ся од зрыхтуваня документациі, а самы роботы мают ся зачати в 2025 році і потырвати до кінця 2026 рока. Дорогу С19 (S19), част пути Via Carpatiа, на одтинку од Ряшова до границі державы в Барвінку мают скінчыти так само до кінця 2026 рока.

Фот. ruskeslovo.com