Сумар дня на 16. січня/януара 2023 р.

Приносиме вам сумар медияльной ґрупы ЛЕМ.фм+ на ден 16. січня/януара 2023 р.

PKL дальше інвестує в Креницю

Як сме інформували, Креницка Містецка Рада рішыла підписати догваріня долголітньой аренды ґмінных ділянок в обшыри Парковой Горы з Польскым Кабельным Транспортом (PKL). Аренда має тырвати 30 років. До ґміны з аренды буде вплывало каждого рока лем 5 тис. злотых, але як подає бургомайстер Крениці, інвестиция в тот терен то промоция для курорту, яка влине на туристичный рух і в результаті до Крениці будут вплывати дальшы пінязі. За наступны 2 рокы PKL плянує заінвестувати в обшыр дальшых 20 млн злотых. В плянах є поставити на Парковій Горі видокову вежу з видоковым пунктом на высокости 35 м. Кошт проєкту то ок. 5 млн злотых. Векша част інвестициі буде ся находила на приватных ділянках PKL, а на ґмінных ґрунтах хотят зробити загороды світла і музикы. В части поляны буде загорода з різбами вызначных осіб курорту і самой Крениці. Має быти розбудуваный і центр рекреациі – хотят там помістити фонтанну, карузелю і тор авт ретро. Наступном великом інвестицийом мало бы быти побудуваня мультімедияльного центра, што дозволит на дальшу подорож в часі. В змодернізуваным будинку мают быти презентуваны архівальны знимкы і фільмы навязуючы до істориі Крениці і Парковой Горы, ци тіж історичных подій на світі. Кошт той інвестициі то ок. 12 млн злотых. Термін інвестицийных прац є передвидуваный на рокы 2023-2025.

Дальшы подіі з нагоды Рока Юрия Новосільского

Разом з початком 2023 рока рушыли подіі припоминаючы 100. річницю народин Юрия Новосільского, вызначного лемківского артисты, філософа і православного теолоґа. Припомнийме, што Сойм Польской Республикы свхалил 2023 рік Роком Юрия Новосільского. Уж заран о 18.00 год. в Ґалериі Стармах в Кракові одбуде ся одкрытя выставы пн. «Працовня Юрия Новосільского». Выстава є пробом припомніня лодзкых і краківскых поміщынь артисты, прикликаня його способу думаня о творчій працы в приватных обставинах, як і характерном лем для Новосільского аранжацийом мешкальных просторів на потребы малярской працовні. Выстава буде доступна до 11. мая тр. До кінця мая мож тіж обзерати памяткы по Юрию Новосільскым і єден з його автопортретів, што поміщены сут на выставі в Палаци Кшыштофоры в рамках проєкту «Видок на Краківян». A уж в тоту неділю 22. січня/януара в Музею Ікон в Варшаві одбуде ся інавґурация выставы батіків інспіруваных працами Юрия Новосільского. Буде она доступна лем місяц, до 21. лютого/фебруара.

Концерт посвяченый памяти Уршулі Яніцкой-Кшывды

В суботу 28. січня/януара тр. в Бабіогірскым Центрі Культуры одбуде ся концерт пн. «Розсыпала ся дуга на гали…», якій посвяченый памяти Уршулі Яніцкой-Кшывды – етноґрафкы, фольклористкы і журналисткы, вызначной знавчыні народной культуры Карпат. Концерт зачне ся о 18.00 год. в видовисковій сали Бабіогірского Центра Культуры. Выступлят Тереса Мірґа і Кале Баля. Вступне дармо.

Новый туристичный комунікат БНП

Бєщадскій Нацийональный Парк выдал новый туристичный комунікат. Інформуют в ним, што вшыткы одтинкы шляків сут одкрыты, але змінна хвиля вымагат одповіднього прирыхтуваня до вандрівкы. В послідніх днях падал мокрый сніг, якій замерзат в ночы і спричынят, што творит ся верства леду, особливо на найвыже находячых ся одтинках шляків. Невелика покрыва свіжого снігу находит ся на выставах пілнічных схылів і верхніх пасмах полонин. Залісены одтинкы шляків сут розмокнены, болотисты і слизкы. Працівникы Парку припоминают, же трасу треба достосувати до актуальной хвилі, своіх можливости і досвідчыня, і вернути перед змерканьом. В горах хвиля може ся раптом мінити і треба быти готовым на додатковы утрудніня.