«Слово» – Праздник св. Василія – неділя, 9.00 год.

Святый Василій Великый – великый стовп Святой Церькви. Святый Єфрем видів на пустыні огняный стовп і чув слова: Такый є святый Василій. Стовп огняной любви ку Богу і ближньому.

А справды святый Василій наповнив у своїм жывоті тоты слова. Здобыв науку світа, яка ся в тім часі дала здобыти. А коли чекала го вызначна карьєра, він напомянутый свойов сестров Макрінов задумує ся над їй словами, спознавать марноту світа. Одходить познавати жывот пустовників а як ся вернув, сам зачав жыти монашескым жывотом. Пише правила про своїх учеників, котры суть поставлены на Святім Писмі а так суть актулны по сучасну добу.

Но Господь мав іншы планы. Кличе на службу Церькви як священика а потім на єпіскопа і архієпіскопа Кесарії Кападокійской. Свої силы давать до того, жебы стояти на обороні святой віры перед різныма блудныма науками, а головно аріанізмом, котрый не признавав божество Хріста. Не боїть ся ани грозьбы самого царя Валента, котрый йому грозить через свого єпарху Модеста выгнанством, стратов маєтку ці муков.

Святый Василій, котрый своє сердце одорвав уж од того земного, сміє ся над такыма грозьбами. Часто говорив два основны прінціпы: памятати на Божу притомность, вшытко робити на Божых очах а вшытко робити на Божу славу.

А хто може описати його велику любов ку ближнім? Сам ся старав о потребуючіх. Своїм монахам часто говорив: Най каждый робить, жебы мав што дати і потребуючому. Коли быв голод, своїма проповідями якбы бухав на сердця богачів, жебы отворили свої сердця і свої сыпанці про бідных. Гооврив слова: Хто може помочі в нужді а так не зробить, є подобный ку убивцям. Будовав притулкы про хворых, терплячіх, подорожных. Сам прислуговав, коло хворых.

Міг повісти зо своїм Небесным Учітельом: Дав єм вам приклад любви ку Богу і ближньому. І мы старайме ся наслідовати тот великый приклад, котрый нам своїм жывотом указує святый Василій. Приклад любви ку Богу і щірой любви ку ближньому. Слава Ісусу Хрісту!

В неділю, 15. януара 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15. януара 2023 р. о 12.00 год. і 16. януара 2023 р. о 2.00 год. за русиньскым часом.