Сумар дня на 13. січня/януара 2023 р.

Приносиме вам сумар медияльной ґрупы ЛЕМ.фм+ на ден 13. січня/януара 2023 р.

Реактивация вытягу на Щавнику штораз барже реальна

Як сме інформували, явила ся шанса на реактивацию лыжного вытягу на Щавнику. Тепер Мушына є іщы ближе реализациі той думкы. Ґміна і місто Мушына покликала специяльну спілку, яка займе ся будовом обєкту. Дальше ведены сут бесіды з інвестором та властительом теренів, котры ґміна хоче одкупити. Ґміна є властительом ок. 40 га ґрунтів і хоче одкупити дальшых 167 га од єдиного другого властителя теренів лыжной стациі. Обшыр є вылісена і обнимат ю плян просторного заґаздуваня. По рішыню ціны, дальшым кроком буде позыскати середкы од інвестора. Не знатя іщы, коли лыжна стация на Щавнику буде реактивувана, але остатні діяня вказуют, же є то реальна до осіягніня ціль. Вытяг был долгы рокы закрытый з фінансовых причын і тых звязаных з правами власности. Правдоподівно треба бы было вымінити ціле ґратя, котре з часом зарджавіло і не надає ся до модернізациі. О реактивацию той зимовой атракциі бургомайстер Мушыны Ян Ґольба старат ся од долшого часу. Кєд поведе ся ю зреализувати, то влине то не лем на туристичный розвиток ґміны, але буде то добра віст і для локальных підприємців і жытелів, котрым інвестиция принесе новы джерела доходів.

Новы інвестициі в Тыличы

Недавно інформували сме, што Тылич был обнятый курортном зоном «Ц» Курорту Крениця. Хоцкы додатковы фонды звязаны зо зміном статусу вплынут до ґміны аж в будучым році, то самоуряд уж тепер заплянувал інвестициі. Власти хотят м.ін. повторити в Тыличы успіх новой пляжы на креницкым Чорным Потоці – тым разом зреализуют подібну атракцию при потоці Мохначка. Не буде інґеренциі в корыто, а заґаздуваный буде сам беріг – высыпаный буде пісок і зорґанізуваны місця до рекреациі. На яр того рока мают быти розвязаны конкурсы оферт і кєд вшытко піде згідно з пляном – пляжа буде одкрыта уж в літнім сезоні. Окрем того в тым році в Тыличы выремонтуют два пляцы забав, одбудуют студню на рынку і перебудуют автобусовый пристанок.

Зла хвиля для лыжных осередків

Кєд не впаде температура повітря, лыжны осередкы будут мати проблем приняти туристів в зимовы вакациі. Уж од заране зимову перерву од вчыня зачынают ученикы пятьох воєвідств: підкарпатского, шлезского, лодзкого, поморского і люблиньского. В часі минулорічной зимы Креницю одвиділо найвекше чысло туристів як раз з люблиньского, підкарпатского і шлезского воєвідств. Актуальна хвиля може єднак влинути на одкликуваня туристами резерваций в готелях і пенсийонатах. Головный проблем то як раз фурт утримуюча ся додатня температура – лыжны стациі не сут тепер залежны од опадів снігу, але од температуры. Коли неє морозу, арматкы не можут працувати і неє як досніжыти лыжны трасы.

Зимовый едукацийный проґрам Татряньского Нацийонального Парку

Татряньскій Нацийональный Парк просит до участи в зимовій едициі едукацийного проґраму «ПоШлякы». Занятя рушают 17. січня/януара і будут ся одбывати до 25. лютого/фебруара. Цілый тот час проходити будут едукацийны прелекциі і природничы прогулькы та зимовы природничо-плястичны варштаты, якы ся одбудут і в онляйновым просторі. Записы і полный гармоноґрам проґраму «Пошлякы» находят ся на інтернетовым сайті Татряньского Нацийонального Парку.