Град і сканзен в Старій Любовні, в котрім суть і скарбы русиньской деревяной архітектуры, навщівило почас минувшого року веце як 182 тісяч турістів, котры заплатили за вступ.
По аґентуру ТASR то потвердив директор Любовняньского музея Далібор Микулик з тым, же в порівнаню з 2021-ым роком іде о нароснутя чісла навщівників о майже 20 тісяч.
„Оцінюєме то барз позітівно кедь возьмеме до увагы, же минувшый рік позначіла пандемія, інфлація, дорогшы енерґії і войновый конфлікт на Україні. Мене несподівало тото чісло, навщівници зістали нам вірны і каждый рік вертають ся до нас,“ повів про аґентуру Микулик.
Підкреслив, же в Любовняньскім музею люди найдуть все штось нове, ці то выставы, експозіції, збіркы, але навщівників за його словами заінтересовав і музейный анімачный проґрам.
Стрітили ся потомкове маїтелів граду
В штатістіках і в році 2022 доміновали навщівници із Словакії, хоць їх было о дашто менше як рік перед тым. Вертати по пандемічных роках зачали і турісты з Польщі.
За найвекшу подію 2022-го року директор поважує стрічу потомків маїтелів граду. Так само прибыла нова постоянна експозіція з назвов Град Любовня – град кралів і старостів. На граді і в сканзені зорґанізовало ся веце културных подій.
Музею подарило ся окрім того выдати на кінцю року четверте продовжіня етноґрафічных записів Яна Лазорика, і до збірок прибыли портреты од мадярьского потомка роду Раісовых.
Рихтують Варгола
До кінця марца буде музей фунґовати в обмедженім режімі. Святочне одкрытя сезоны рихтують на послідню апрільову неділю, коли одкрыє ся і велика выстава присвячена річніці ружбашской кральовской свадьбы.
„Другым тяглом сезоны бы мала быти необычайна выстава Кральовны Ендія на кральовскім граді Любовня у співпраці з Музейом модерного уменя Енді Варгола в Меджілабірцях,“ доповнив Микулик. Не будуть браковати ани шторічны події як Славности на граді ці Кіріло-методійскы славности.
Планують і інвестічны акції
Окрім того музей в тім році планує і рештаврованя добовых меблів з бывшого касіна в такзванім Білім домі і Вышніх Ружбахах.
Жадати музей хоче і о фінанчны средства на всокочіня северовыходной кріпости а презентацію воєньскых касарні. На проєкт жадають з проґраму міністерства културы Словацькой републікы з назвов Обновме собі свій дім суму 900 тісяч евр.
За словами Микулика вже мають проєктову документацію, ставебне поволіня і актуалны ціны матеріалів. Грошы будуть глядати вєдно з Пряшівскым самосправным крайом, котрый є зряджовательом музея.
„На ярь бы сьме мали знати, ці нам грошы схвалять. Покля ніт, будеме глядати іншы пути, ставебне поволіня маєме до 2024-го року.“
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Повязаны дописы
Ґорлиці 106,6 MHz
