Сумар дня на 9. січня/януара 2023 р.

Приносиме вам сумар медияльной ґрупы ЛЕМ.фм+ на ден 9. січня/януара 2023 р.

Рекордовый буджет в Креници

В 2023 році ґміна Крениця буде мала рекордовый буджет. То аж 165 млн злотых з доходів, з чого 60 млн буде передане на інвестициі. Хоц в великій мірі будут они повязаны з ближучыма ся Европейскыма Іграми, то в буджеті нашли ся і тоты комунальны. Пінязі будут заінвестуваны в ремонт ледовой галі, роверовых трас і МТБ, але і ремонт 6 улиц, 2 паркінґів і водно-канализацийной сіти та будову очыщальні. Буде і курортна промеса на розбудову туристичной інфраструктуры на Парковій Горі і будову амфітеатру. Додатково Містецка Рада рішыла підписати догваріня долголітньой аренды з Польскым Кабельным Транспортом, якій хоче за найблизшы два рокы заінвестувати в обшыр Парковой Горы дальшых 20 млн злотых.

Новый інформацийный порталь про біциґльовы шлякы в Низкым Бескіді

Уж в тым тыжни, 15. січня/януара рушыт Роверова Радоцина – інформацийный порталь, якій буде тыкал біциґльовых шляків в Низкым Бескіді. Як подал єден з партнерів проєкту, Надлісництво Ґорлиці, порталь буде мобільный – мапы шляків мож буде побрати. Вызначеных было 18 головных трас, але вариянтів є більше, зато же головны трасы ся переплітают. Каждый годен найти дашто на міру своіх фізичных можливости – трасы мают од парунадцетьох до близко стох кілометрів. Шлякы будут дрібницьово описаны під технічным і познавчым взглядом. На мапах будут означены місця, в котрых вартат ся затримати – од природничых цікавинок по історичны памяткы. Стежкы будут вести через лісы, дикы лукы, з далека од головных комунікацийных трас. Хоснуючы опубликуваны мапы, мож буде примірно выбрати ся на біциґльову прогульку по неістнуючых лемківскых селах – Радоцині, Чорным ци Незнайовій.

Выремонтувана капличка в Бодаках

Завершеный ремонт капличкы в Бодаках. Обєкт был побудуваный коло 1900  рока. Выремонтували стріху – вымінили покрытя з ґонту, де был стриманый процес нищыня і деґрадациі капличкы. Давный блеск капличці привернула выміна характерного для ней даху і выконаня нового тинку на зовни обєкту. Цілковитый кошт ремонту то 21,5 тис. зл, з чого 12 тис. покрыло Малопольскє Воєвідство, а 9,5 тис. зл Ґміна Санкова.

«Батікы інспіруваны працами Юрия Новосільского»

Ближат ся дальшы подіі звязаны зо святкуваньом 100. річниці народин Юрия Новосільского. Уж 22. січня/януара о 17.00 год. в Музею Ікон в Варшаві, філиі Музею Варшавской Православной Митрополиі, одкрыта буде выняткова выстава, інспірувана творчістю того вызначного лемківского творці. Назва выставы то «Батікы інспіруваны працами Юрия Новосільского». Експонуваны будут працы участників занять батіку проходячых в Маґазині Штук – плястичній працовни Осередка Культуры Охоты. Вернісажови буде товаришыл концерт церковной музикы. В техніці батіку наперемінно накладат ся на основу верствы воску і барвника. Як пишут орґанізаторы, батік є специфічном візуальном техніком, в якій не даст ся осягнути малярского моделюнку обєктів, і непринимаючом поправок. Зато творчіст невельох артистів може быти інспірацийом прац выконаных том техніком. Накладаючы ся фарбы творят похідны одтіни, результатом чого є хроматична гармонія. Є то спійне з малярском реториком Новосільского і дозвалят переносити ю на язык батіку.

Джерело фотоґрафіі: sekowa.pl