«Слово» – Праздник Рождества – неділя, 9.00 год.

Хрістос раждаєт ся! Такым радостным поздравканьом хочу поздравити вшыткых вас з радостным праздником Рождества Хрістового.

Праздник, котрый нам говорить о Божій великій любви. Любви, коли Божый Сын із любви ку нам бере на себе людьске тіло. Ставать ся чоловіком, не переставши быти Богом. Владыка неба і землі ставать ся чоловіком. Царь світа ставать ся рабом. Яке привітаня ся йому дістало од владык того світа, од представителів духовных выбраного народа, од простых людей і од поганів?

Цісарь Авґуст давать наказ списати людей. Йосиф і Марія ідудть до Віфлеєма дати ся записати. Не было про Марію, котра кажду хвілю чекала народжіня дітины, іти на далеку дорогу. Но підволює ся Божій волі. А яка несподіванка їх чекать там, коли ниґде їх не прияли. Наконець нашли яскыню за містом, і там владыка неба і землі приходить на тот світ.

Ангел появлює ся пастырям – звістую вам велику радость – народжіня Спасителя Хріста у Віфліємі. Пастырі ідуть там, і оддавають честь Хрістови і вертають ся і прославляють Бога за вшытко, што чули і виділи. Мудерці видять звізду і спознавають – народив ся царь в Ізраілю. Выдавають ся на далеку дорогу, жебы оддати честь. Приходять до Єрусалима, ту ся дізнають, же Ісус ся мать народити у Віфліємі Юдейскім. І звізда їх провадить аж ку дітині. Они зрадовали ся, приношають свої дары – злато, як царьови, кадило, як Богу, а міро – як безсмертному. Но ангел їх напоминать, не вертати ся ку Іродови, бо хоче убити дітину. Но іншов дорогов ся вернули домів.

А Ірод а учітелі закона, котры самы потверджують – у Віфлемі мать народити ся. Они глядають сопособ, як його убити. Не наслідуйме приклад Ірода, ани учітелів закона, котры того, што меджі своїх пришов, не прияли. Але послухайме ухами і сердцьом слова пісні канона Хрістос раждаєт ся, славите, Хрістос з небес, стрічайте, Хрістос на землі, возносите ся, пойте Господеви вся земля… Хрістос раждаєт ся!

В неділю, 8. януара 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 8. януара 2023 р. о 12.00 год. і 9. януара 2023 р. о 2.00 год. за русиньскым часом.