Сумар дня на 23. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 23. грудня/децембра 2022 р.

Русины на Словациі печатали «Альманах днешньой підкарпатской русиньской літературы»

Явил ся новый альманах днешньой русиньской літературы. Публикацию каждый рік выдают Русины на Підкарпатю, од парох років стоят за тым Закарпатскє Областне Науково-Культуролоґічне Общество ім. Александра Духновича і Русиньскій Культуролоґічный Клюб. Того рока вынятково книжка была друкувана на Словациі, має наголовок «Альманах днешньой підкарпатской русиньской літературы». Помочы нашым братям і сестрам на Підкарпатю рішыло здружыня Русин Медия. Не ішло лем о фінансову поміч, але і шыріня творчости сучасных русиньскых писателів з Підкарпатя, яка не єст знана в другых державах. В публикациі мож найти тексты 19 авторів – м.ін. Михаіла Чухрана, Володиміра Рошко, Лесі Стецович, але і менше знаных авторів і дебютантів. Альманах чыслит 200 сторон, єй едитором є Юрий Шыпович, а одповідным редактором за выдавателя Русин Медия Петро Медвідь. Новый альманах реаґує вступным словом на ситуацию на Украіні і є присвяченый воякам 128. окремой гірско-штурмовой Закарпатской Бриґады, котры достойно хоронят державу, в якій жыют.

ПСК зреализувал дальшы проєкты в русиньскых селах

Як інформувало Одділіня комунікациі і пропаґациі Пряшівского Самосправного Краю (ПСК), ґрантовый проґрам ПСК з назвом Вызва про реґіон уможливил реализацию дальшых атракцийных проєктів в обшыри культуры. Окрем інчого поміг він сохранити нацийональны культурны памяткы і в двох русиньскых селах – Калинові, в окресі Меджелабірці, і Ольшавици, в окресі Левоча. В Калинові обновены были інтерєр і екстерєр грекокатолицкой церкви Успіня Пресвятой Богородиці, што фінально звекшыло памяткову вартіст обєкту. ПСК дофінансувал проєкт сумом 20 тис. евро. В селі Ольшавиця реконструуваный был сыпанец, перше пошкодженый по великых зливах. І тот проєкт ПСК підпорил сумом 20 тис. евро. Лем в тым році, в рамках Вызвы про реґіон посередництвом проґраму Підпора обновы культурных памяток UNESCO і нацийональных культурных памяток, край підпорил 23 проєкты цілковитом квотом 940 тис. евро.

Другій етап консультаций тыкаючых желізницьового получыня Ліґниця-Любін-Ґлоґів

Іщы до віторка 27. грудня/децембра мож выполнити дальшу анкєту тыкаючу створіня желізницьового получыня Ліґниця-Любін-Ґлоґів. То уж другій етап консультаций з жытелями Польковиц. В новій анкєті находит ся пят можливых вариянтів будовы новой леніі, разом з мапами. Мож ю выполнити на офіцияльным сайті ґміны Польковиці. Третій етап консультаций заплянуваный єст на липец/юлий 2023 рока. Проєкт аґломерацийной желізниці закладат переізды потягів зо скорістю 120 км/г через полністю зелектрифікувану трасу, што получыт Ліґницю, Любін, Польковиці і Ґлоґів.

Желаме Вам вшыткого найліпшого!

А на конец днешніх новин хочеме передати святочны желаня вшыткым тепер празднуючым. За григорияньскым календарьом заран выпадат ден велиі Рождества Христового, святкуваного окрем християн західньой традициі і вірныма дакотрых східніх Церкви, котры ідут за новым стильом. Зато вшыткым слухачам, котры святкуют Різдво уж тепер, желаме Божой благодати, миру, щестя, здравля і вшыткого найліпшого в новым 2023 році. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях.