Сумар дня на 22. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 22. грудня/децембра 2022 р.

Велийна Стріча в Рускій Бурсі

Свята штораз ближе. Для тых, што святкуют за тзв. новым стильом, але і для тых, што помалы будут рыхтувати ся до Рождества за юлияньскым календарьом. Стоваришыня «Руска Бурса» в Ґорлицях традицийно в тым святочным періоді красні просит вшыткых на Велийну Стрічу, котра в тым разом одбуде ся в пятницю, 30. грудня/децембра. Початок о 16.00 год. В рамках подіі одбуде ся промоция долгожданой кухарской книжкы з лемківскыма стравами, выступит місцевый ансамбль Терочка, а окрем того буде мож посмакувати зрыхтуваны специяльно на бурсяну велию нашы різдвяны стравы. Ждеме Вас!

О. Репела доціненый вчас Ґалі Волонтерства

15. грудня/децембра одбыла ся Ґаля Волонтерства любіньского повіту. Вчас подіі оцінено особы, якы в текучым 2022 р. несли поміч потрібуючым. Єдным з Волонтерів 2022 Рока был выбраный парох православной церкви в Любіні, о. прот. Богдан Репела. Вчас ґалі были переданы нагороды і для інституций – такых як школы ци предшколя за промуваня ідеі волонтерства і вражливости на другого чловека. Статуі Повітового Цертифікату Добра вручыл любіньскій староста Павел Клещ. Тогорічны волонтеры были оцінены м.ін. за несену поміч біженцям з Украіны. В таку поміч заанґажуваны были і православны Любіняне, в тым о. Богдан Репела.

Одкрыли Ґалерию Климчака в Лютині

Як подал Інформацийный Центр Грекокатолицкой Пряшівской Архієпархіі, в середу 14. грудня/децембра владыка Петро Руснак посвятил просторы новой Ґалериі Мікулаша Климчака в Лютині. В тым єдным з найвызначнійшых поломницкых місц грекокатоликів на Словациі участників торжественной подіі привитал місцевый парох. В рамках стрічы одбыло ся і одкрытя выставы творів, котрых автором є маляр Мирослав Бухер. Будова Ґалериі Мікулаша Климчака реализувала ся од липця/юлия 2021 р. до червця/юнія 2022 р. Фінансово выбудуваня підпорил сумом близко 173 тис. евро і Пряшівскій Самосправный Край. Архітектонічный плян новой ґалериі є з ательєру архітекта Петра Марцінка. Лютиньска ґалерия достала мено по Мікулашу Климчаку (1921-2016), якій был вызначным словацкым артистом, філософом і іконописцьом, котрый гордо голосил ся до грекокатолицкой Церкви. Походил з Гуменного, ціле жытя черпал в своіх творах з традицийной візантийской іконоґрафіі, але не робил традицийных ікон подля церковных канонів. Мал свій власный стиль. Його іконы окрашают середину Базилікы мінор в Лютині, але сут і в інчых церквах на Словациі.

Центр блаженного Теодора в Кошыцях

Як інформує радийо Русин.фм з Братиславы, в віторок 13. грудня/децембра посвятили в Кошыцях Денный Центр ім. блаженного Теодора Ромжы, котрый основала Кошыцка Грекокатолицка Єпархія. Центр посвятил кошыцкій владыка Кірил Василь. Під покровительством блаженного Теодора просторы будут служыти дітям, молодежы і родинам. Актуально в центрі проходят головно стрічы з людми, котры втекли перед войном на Украіні. За проєкт центра є одповідальный єпископскій синкель. В подіі брали участ м.ін. представникы німецкой фундациі Hoffnungzeichen, котра фінансово помогла з реконструкцийом просторів.