ПСК дав грошы на далшы народны културны памяткы в русиньскых селах

Як інформовало Одділіня комунікації і пропаґації Пряшівского самосправного краю (ПСК), ґрантовый проґрам ПСК з назвов Вызва про реґіон уможнив реалізацію далшых атрактівных проєктів у области културы.

Найновіше край поміг сохранити народны културны памяткы в Кежмарку, Спішскій капітулі, Стражах під Татрами, і в двох русиньскых селах – Калинові, в окресі Меджілабірці, і Ольшавіці, в окресі Левоча.

В першім ослободженім селі на теріторії бывшой Чехословакії, в Калинові, зреалізовав ся проєкт обновы інтерьєру і екстерьєру містной народной културной памяткы – Ґрекокатолицькой церькви Успенія Пресвятой Богородіці.

Класіцістічный храм візантійского тіпу быв збудованый в році 1800 і реконштрукція реалізовала ся в трьох фазах. Вымінили ся облакы, зробило ся одводніня, оправили ся ваковкы і зробила нова іншталація електрикы.

Проєкт ПСК підпорив сумов 20 тісяч евр, і реконштрукція принесла зліпшіня ставебно-технічного стану обєкту, охрану його історічных мурованых конштрукцій, а в непосліднім шорі ся звекшыла памяткова вартость калинівской церькви.

В селі Ольшавіця, де доднесь сохранили ся деревяны хыжы, уможнила 20-тісячова крайска дотація реконштрукцію народной културной памяткы – сыпанця. На обєкті, котрый быв до великой міры пошкодженый по великых зливах, обновили ся зрубовы пошкоджены части. Сыпанець затіснив ся іловитов мазанинов і натер вапяным молоком.

Справцьом предметного обєкту є село, і по реконштрукції бы сыпанець мав в рамках розвитку турістічного руху быти приступный турістам.

Пряшівскый самосправный край в рамках Вызвы про реґіон посередництвом проґраму Підпора обновы културных памяток UNESCO і народных културных памяток лем в тім році підпорив 23 проєктів з алокаційов понад 940 тісяч евр.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА