Сумар дня на 19. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 19. грудня/децембра 2022 р.

Перша по долгій перерві стріча СКУтНіЕМ

14. грудня/децембра прошло 79. засіданя Спільной Комісиі Уряду та Нацийональных і Етнічных Меншын. Урядову сторону Комісиі репрезентувал віцеміністер Блажей Побожый, а меншынову Григорий Куприянович. Участ брали і міністер едукациі і наукы Пшемыслав Чарнек та віцеміністер Дариюш Пьонтковскій, якій был покликаный до складу комісиі як репрезентант міністра oсвіты. Передано м.ін. інформацию о працах над поділом дотациі на реализацию в 2023 р. задач маючых на ціли охорону, захованя і розвиток культуровой достоменности нацийональных і етнічных меншын та захованя і розвиток реґіонального языка. Высокіст буджету для меншын має в будучым році остати незмінена. Як подали на офіцийным урядовым сайті – бесідуваны были тіж темы звязаны з меншыновом освітом та квестия нацийонально-етнічной структуры населіня Польщы, в рамках нацийонального списуваня, якє проходило влони. Было то перше засіданя Спільной Комісиі од понад піл рока, перше од завершыня стану завішыня участи в працах Комісиі через більшіст членів репрезентуючых меншыны.

Меншынова сторона СКУтНіЕМ бесідувала про актуальны проблемы меншын

Традицийно ден скорше, 13. грудня/децембра, в Варшаві одбыло ся засіданя меншыновой стороны Спільной Комісиі Уряду та Нацийональных і Етнічных Меншын. Окрем інчого были бесідуваны такы темы як: дискримінация німецкой меншыны в квестиі вчыня меншынового языка, квестия результатів повселюдного списуваня тыкаюча нацийонально-етнічной структуры соспільства ци справа поділу дотаций про меншыны на 2023 рік. Піднесеный был і проблем потребы збільшыня середків з буджету державы про охорону, захованя і розвиток культуровой достоменности меншын. Як уж знаме – буджет на меншыны остане єднак незміненый. Окрем того порушены были і проблематика додатковых назв місцевости в языках меншын на знаках при публичных дорогах, потреба реформы систему освіты ци проблем імплементациі в Польщы записів Европейской карты реґіональных і меншыновых языків.

Зона Економічной Активности в Ґорлицях буде готова уж в будучым році

Місто Ґорлиці рыхтує терены під Зону Економічной Активности. До заґаздуваня єст 5 гектарів ґрунтів. Част прац є уж зроблена. Выкарчуваны были дерева, тепер побудуют доіздовы дорогы і комунальну сіт. Зачали ся роботы звязаны з перебудовом істнуючой канализациной сіти і будовом ґазовой сіти на обшыри Зоны. Самоуряд має уж документацию, вшыткы згоды і будовляне позволіня. В будучым році має там быти готовых 11 атракцийных ділянок для інвесторів. Цілковитый кошт задачы то понад 7,3 млн злотых, з чого понад 5 млн покрыют середкы з малопольского воєвідства. Цілю проєкту є місцевый розвиток підприємств та стимуляция економічной ситуациі, а што за тым іде – творіня новых місц працы для жытелів реґіону.

В горах зачал ся лыжный сезон

Добры вісти для любителів зимовых спортів. В минулый вікенд рушыла векшіст лыжных вытягів в сандецкым реґіоні. На любителів ізды на лыжах ци сновборді ждут уж зрыхтуваны лыжны трасы в Верхомли. Лыжны трасы одкрыли і в Креници – выстартували вшыткы вытягы на Солотвинах і лыжна стация на Креницкій Яворині. Так само діют уж обі лыжны стациі в Тыличы. З початком сезону працівникы GOPR припоминают, же вшелеяка активніст, ци то на лыжах, ци на шляках, повинна ся вязати з прирыхтуваньом і одповідальністю.