Сумар дня на 28. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 28. листопада/новембра 2022 р.

Ден Русинів Польщы

Уж неодолга, бо в тым тыжни святкувати будеме Ден Русинів Польщы. Свято тото было встановлене на ден 5. грудня/децембра, для упамятніня віче во Фльоринці, якє в 1918 році дало початок Рускій Народній Республиці Лемків. Як каждого рока, споминовы подіі будут проходити в нашій Рускій Бурсі в Ґорлицях. Стріча зачне ся о 15.00 год. в неділю – 4. грудня/децембра. Доповід пн. «Помедже узнаньом а борбом о перетырваня. Політика достоменности лемківскых активістів» выголосит др габ. Ева Міхна, професор Ягайлоньского Університету. Артистично подію дополнит выступ діючого при Рускій Бурсі ансамблю Терочка. Пак просиме на почастунок. Подія отримала дофінансуваня з Міністерства Внутрішніх Справ і Адміністрациі. Для упамятніня нашых предків, якы основали Руску Народну Республику Лемків, споминовы подіі зачнут ся стрічом во Фльоринці. О 14.00 год., перед подійом в Рускій Бурсі в Ґорлицях, стрітиме ся во Фльоринці, при долинці перед плебанійом, де ся 104 рокы тому одбыло історичне віче.

Власти Словацкой Республикы не хотят схвалити закону о нацийональных меншынах

Поінформувал о тым Абель Равас, бывшый полномічный влады Словацкой Республикы про ромскы комуніты. 21. листопада/новембра тр. уряд предложыл пропозицию пляну леґіслятивных задач на 2023 рік до меджересортного припоминкового процесу. Є то стратеґічный материял, котрый дефініює леґіслятивны задачы власти, міністерств і центральных орґанів державной справы на дальшый період. В пляні не є спомянута пропозиция закону о поставліню нацийональных меншын, ани плянуваный термін його схваліня. Є то неакцептувальне про меншыны. Абель Равас кличе люди і орґанізациі електронічно підписати громадну припоминку ґу незряджыню закону о поставліню нацийональных меншын до пляну леґіслятивных задач Уряду Словацкой Республикы на 2023 рік. Припоминку можут підписати словацкы громадяне лем до днес.

Партия Солідарна Польща хоче зліквідувати привілегіі для меншын

Як подал радный зо Щеціна Дариюш Матецкій, Солідарна Польща прирыхтувала проєкт закону, што ліквідує выборчу привілегію німецкой меншыны в Польщы. Новы переписы дозволили бы заблокувати в будучности выбір до польского парляменту великого чысла репрезентантів ічных нацийональности, не лем німецкой.Радный Матецкій спомнул на своім Твітері, же істнує «загорожыня», же в будучым украіньска меншына може успішно старати ся запевнити собі в выборах великє чысло репрезентатів в польскым соймі. Зато проєкт уставы подля него єст барз простый.

Beliansky Express вертат на трасу

Добра інформация для любителів гірскых прогульок. Од 31. грудня/децембра на торы верне популярный серед туристів Beliansky Express. Медженародный склад буде курсувал на трасі Мушына – Попрад Татры до 26. лютого/фебруара будучого рока. Експрес ходилл буде в вікенды, в обі страны рано і пополудни. Подорож потырват нецілы дві годины і поведе м.ін. через Стару Любовню ци Кежмарок. В самым Попраді мож ся буде пересісти на гірску желізницю і достати до Щырбского Озера в Татрах.