В повязаню з енерґетічнов крізов шпорити мусить і Свідник

Як інформує аґентура TASR, місто Свідник прияло в повязаню з енерґетічнов крізов веце кроків. Матерьскы і основны школы, котрых зряджовательом є місто, были інштруованы, жебы шпорити.

Хоць місто має, з оглядом на то, што діє ся на рынках, ціну електрикы накуплену за добру ціну, 112 евр за меґаваттгодину, і Свідник має контракт іщі на далшы два рокы, основна умелецька школа, як і вшыткы матерьскы і основны школы, котрых зряджовательом є місто, были радніцьов інштруованы, „жебы были способны ушпорити електричну енерґію, но на другім боці жебы не обмеджіли комфорт школярів“.

„Поступно реконштрууєме школьскы будовы. Наприклад в єдній із матерьскых школ сьме комплетно вымінили електроіншталацію, а так само придали нове, шпоровливе освітліня. Підписали сьме контракт на выбудованя зеленой стріхы, значіть єдна з матерьскых школ перейде і таков реконштрукційов,“ повіла про аґентуру пріматорка Свідника Марцела Іванчова.

„Што до фунґованя уряду, шпориме, стягли сьме топліня, як і вшыткы самосправы на Словакії, бо то способ, як знаме прямо овпливнити вытраты,“ пояснила пріматорка.

Кінцьом октобра в місті одкрыло зимный штадіон. Подля Іванчовой утримованя і ход незактыртого леду стояли вельо фінанцій і якость служеб была барз низка.

„Были сьме способны мати в ході некрытый зимный штадіон ани не два місяці, кедьже суть теплы зимы. Уж теперь видиме, же шпоріня на електричній енерґії є велике. Лем наморожіня леду, што при спущаню зимного штадіона найвекша вытрата, тырвало о половину менше часу. Віриме, же мінімално персоналны вытраты на ход зимного штадіона будеме знати выплачати із вступного і ушпоріня електричной енерґії,“ конштатовала пріматорка Іванчова.

В розрахунку на 2022-ый рік мало місто подля пріматоркы на ход зимного штадіона напланованых понад 30 тісяч евр. Мінімално до кінця рока буде місто знати платити ход штадіона, а Іванчова має надію, же то буде реалне і по новім році, кедже чекають на можливости дофінанцованя шпортовых ареалів з боку державы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА