Сумар дня на 24. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 24. листопада/новембра 2022 р.

Святого Михала в Михалові

21. листопада/новембра (8. листопада/новембра за старым стильом) в вельох нашых парохіях, так на Лемковині як і чужыні, проходили святочны богослужыня на праздник св. Архістратига Михала Архангела. Вельо храмів є як раз під його покровительством. Святочны богослужыня проходили в тот ден в єдній з лемківскых парохій на чужыні (нижньошлескє воєвідство). До села Михалів завитал з архіпастырском послугом владыка Юрий, архієпископ вроцлавско-щеціньской єпархіі ПАПЦ, ординарий Польского Войска. Вірны михалівской парохіі то в більшости потомны выселеных з Фльоринкы. Хоц в Михалові 75. річницю Акциі Вісла і при тым річницю основаня парохіі упямятнил 9. липця/юлия т.р., то і теперішня молитва была нагодом на памят за вшыткы жертвы выгнаня, тым більше, же літом владыка не зміг быти в Михалові. Архіпастыря в порогах храму побудуваного в західньо-лемківскым стилю витали діти та староста церкви Юрий Куземчак. Парохом михалівской церкви є лемківскій священник, о. Адам Горбаль.

Стріча з книжками Мурянкы

Центр Заанґажуваных Досліджынь над Культуровым Тырваньом Выділу «Артес Лібералес» Варшавского Університету та його Выдавництво просят на промоцию двох книжок Петра Трохановского (Мурянкы). В рамках презентациі, яка одбуде ся в Варшаві 2. грудня/децембра, представляны будут дві найновшы публикациі того лемківского творці: другє выданя біоґрафіі «А Вісла дальше плыне» та «Лемківска душа. Выбраны вершы переведены на шлезскій язык Варфоломійом Ванотом». Обі книжкы лемківскы чытаты могли придбати хоц бы вчас тогорічных лемківскых подій. Стріча зачне ся о 17.00 год. в фуає Бібліотекы ВУ при ул. Добрій 56/66. Вступне дармо.

Новый префект для східніх церков

21. листопада/новембра 2022 р. папа римскій Франциск призначыл на префекта Дикастериі для східніх церков преосвященного Клавдия Ґуджеротті, дотепершінього апостольского нунция в Великій Британіі. Своі обовязкы зачне выконувати з другой половины січня/януара блужучого рока. На тій посаді заступит кардинала Леонардо Сандрі, котрый скінчыл 79 років, і котрого за префекта товдышньой Конґреґациі призначыл в 2007 р. іщы папа Венедикт XVI. Новый префект знає пару языків. Дикастерия для східніх церков є дикастерийом римской куриі і єй задачом є старати ся о 23 східні церкви, якы сут в єдности з Римом. Была основана в 1917 р.

Новы послянці ПСК склали присягу

Предсідатель Пряшівского Самосправного Краю (ПСК) Мілан Маєрскій і 62 депутатів Заступительства ПСК склали в остатній понедільок 21. листопада/новембра святочну присягу. Подія проходилиа в історичным будинку Театру Йонаша Заборского в Пряшові. Новый склад жупных (самоурядовых) депутатів по святочній присязі взял участ і в першым засіданю орґану. В Заступительстві ПСК по выборах выникнули штырі клюбы. Клюб жупана Маєрского, в котрым сут партиі KDH, SaS, Za ľudí, веде бывша пріматорка Пряшова Андреа Турчанова. Выникнул і Клюб Hlas і незалежны. Дальше будут в заступительстві діяти два клюбы незалежных депутатів. Першым є Клюб незалежных депутатів, котрый веде Штефан Бієляк, другым – Клюб Вєдно за реґіон. Серед депутатів сут і Русины, як хоц бы Мартін Караш, шеф Русиньской Оброды на Словациі ци Михал Калиняк, якій кандидувал на фунцкию жупана ПСК.