Равас: Влада не хоче народностный закон. Спустила ся електронічна громадна припомінка

Влада Словацькой републікы не хоче схвалити закон о народностных меншынах, інформує Абел Равас, соціолоґ, презідент Інштітуту Матєя Бела і бывшый уповномоченый влады Словацькой републікы про ромскы комуніты.

Людей і орґанізації Равас на своїм офіціалнім сайті на сіті Facebook вызывать, жебы електронічно підписали громадну припомінку, котру спустив Інштіту Матєя Бела на порталі mojapeticia.sk, якый справує обчаньске здружіня VIA IURIS.

Влада зо законом не рахує

Як пише ся в тексті ку громадній припомінці, 21-го новембра 2022-го року Уряд влады передложыв пропозіцію плану леґіслатівных задач (ПЛЗ) на рік 2023 до меджірезортного припомінкогово процесу. План є стратеґічный матеріал, котрый дефінує леґіслатівны задачі влады, міністерстев і централных орґанів державной справы на далшый період.

Но в споминанім матеріалі не є спомянута пропозіція закона о поставліню народностных меншын, ани планованый термін його схваліня.

„Тот факт є о то важнішый, же ПЛЗ на рік 2022 таку пропозіцію іщі обсяговав, і то з терміном май 2022,“ пише ся в тексті ку громадній припомінці. Як далше інформують інціаторы припомінкы, з медіалізованых інформацій ся знать, же Уряд уповномоченого влады СР про народностны меншыны пропозіцію закона приготовив.

„Но матеріал ся в році 2022 (затля) не дістав до леґіслатівного процесу. Зато фаховы кругы очековали його зараджіня до ПЛЗ в році 2023. То, же ся так не стало, не є акцептовательным з погляду народностных меншын.“

Ініціаторы громадной припомінкы підкреслюють, же закон о поставліню народностных меншын є важным бракуючім елементом сістемы охраны меншын на Словакії.

„Як правилно бісідує Проґрамове выголошіня влады СР схвалене в році 2021, іде о єдно із средств спомаліня асімілації членів народностных меншын, і ґаранцію практікованя меншыновых прав выходячіх із Конштітуції СР. То, же не існує комплексный закон, запричінює тяжкости при практікованю прав народностных меншын і при формованю народностной політікы влады СР.“

Із спомянутых причін пропонує Інштітут Матєя Бела, вєдно із підписаныма партнерьскыма орґанізаціями а словацькыма гражданами, знова зарадити задачу схвалити закон о поставліню народностных меншын до плану леґіслатівных задач влады Словацькой републікы.

Громадна припомінка

Громадна припомінка – то інштрумент, за помочі котрого люди можуть припомінковати пропозіції законів ці іншых правных приписів.

Мусить іти о єднозначно формуловану і выарґументовану пропозіцію на управу пропозіції конкретного правного припису. Може іти о пропозіцію нового тексту, управу існуючого тексту, доповніня, зміну, выпущіня або уточніня первістного тексту.

Покля громадну припомінку підпорить холем 500 особ, пак є передкладатель закона повинный їднати із представителями підписаных людей і орґанізацій. Покля сьте граждан Словацькой републікы, припомінку можете підписати за тым мотузком. Припомінку мож підписати лем до 28-го новембра.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА