Пряшівскы крайскы депутаты склали святочну присягу

Председа Пряшівского самосправного краю (ПСК) Мілан Маєрьскый і 62 депутатів Заступительства ПСК склали 21-го новембра 2022-го року святочну присягу. Трьоми депутаты на присязі не были участны.

Подія проходилиа в історічній будові Театру Йонаша Заборьского в Пряшові, інформовала Леа Леготьска з Одділіня комунікації і пропаґації ПСК.

Функцію обгаїло по октобровых крайскых выборах цілково 39 депутатів, 26 є новых, причім шість депутатів ся до крайского парламенту знова вернуло, кедьже уж в нім сиділи в минулости. В порівнаню з попереднім функчным періодом має крайскый парламанет о трьох депутатів веце.

Векшыну мають незалежны

Меджі 65-ма депутатами, котры дістали мандат на найблизшы штири рокы, є лем вісем жен і 57 хлопів. В Заступительстві ПСК мають мандат і трьоми депутаты Народной рады Словацькой републікы, успішна кандідатка, котра выконує і функцію державного секретаря, а 16 старостів і пріматорів.

Векшыну нового складу крайского парламенту творять незалежны кандідаты, котрых є 27. Другы найвекшы за кількостьов депутатів суть згодно дві коаліції. Першов є коаліція KDH, Sme rodina, SaS, Za ľudí, другов Hlas – sociálna demokracia, Smer – SD, Aliancia-Szövetség.

Выникли штири клубы, выбрали віцежупанів

Новый склад жупных депутатів по святочній присязі брав участь і на першім офіціалнім засіданю заступительства.

В Заступительстві ПСК выникли штири клубы. Клуб жупана Маєрьского, в котрім суть партії KDH, SaS, Za ľudí, веде бывша пріматорка Пряшова Андреа Турчанова. Выникнув і Клуб Hlas і незалежны. Далше будуть в заступительстві діяти два клубы незалежных депутатів. Першым є Клуб незалежных депутатів, котрый веде Штефан Біеляк, другым Клуб Вєдно за реґіон, на чолі котрого буде стояти Ян Гірчко. Затля не склав присягу, клуб дочасно веде підпредседа Йозеф Кмець.

На посаду віцежупанів, підпредседів краю, депутаты выбрали голосованьом Штефаня Біеляка (Клуб незалежных депутатів) і Йозефа Канущака (Клуб KDH, SaS, Za ľudí).

Третій віцежупан затля не быв выбратый. Партія Hlas – sociálna demokracia хотіла номіновати Михала Калиняка, котрый быв протикандідатом Маєрьского на посаду жупана, но Маєрьскый його номінацію не акцептовав.

Депутаты схвалили і зряджіня фінанчной комісії, котрой председкыньов буде Зузана Беднарова. Найблизше засіданя Заступительства ПСК одбуде ся 12-го децембра, і головнов темов буде розрахунок на 2023-ій рік.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА