«Слово» – 23-тя неділя по Сошествії Святого Духа – неділя, 9.00 год.

Ісус Хрістос приходить до ґадариньского краю. Там його стрітив чоловік опанованый нечістым духом. Лем што його увидів, приходить ку Ісусови а кричіть: Што тя до мене, Ісусе, Сыну Найвысшого Бога?

Ісус йому нич не говорив. Но бісноватый чоловік, або демоны в нім не можуть стерпіти притомность Хріста. Є то про них мука. А коли Ісус наказує одыйти з того чоловіка, они його просять, жебы їх послав до стада свинь, котре ся пасло недалеко. А Ісус їм доволив. Не зато, жебы зробив злому духу по волі, але жебы нам дав науку.

Указує, же перед приходом Хріста, злый указовав свою силу на тім нещастнім чоловікови. Быв повязаный желізныма ланцами і оковами, вшытко перервав. Нихто не міг ходити тов дорогов. Каждому наганяв страх. Но як увидів Хріста, нараз зачінать просити. Тым нам Ісус указує, же діавол не мать жадной моци над тыма, хто належыть Хрістови.

Лем кедь чоловік сам ся отворить злому, Бог допущать, же ся находить в моци злого, бо решпектує нашу слободну волю.

Коли народ із міста пришов а увиділи чоловіка, перед тым опанованого демонами при здравім розумі, а виділи загыбель своїх свинь, просили Ісуса, жебы одышов од них. Ісус без слова насів до лодькы і одышов.

Бог нам давать слободу, указує нам, што значіть быти з ним і што значіть быти в моци злого. Він ся насилу не навязує. Він тихо дуркать на двері сердця. І мы маме слободну вольбу: Прияти Хріста, його слово, його науку а жыти в радости а покою і мати вічный жывот. Або одвергнути, одослати од себе, так як то зробили жытелі того края, але яка біда тогды ту на землі а непорівнано веце у вічности? Слава Ісусу Хрісту!

В неділю, 20. новембра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 20. новембра 2022 р. о 12.00 год. і 21. новембра 2022 р. о 2.00 год. за русиньскым часом.