ПСК підпорив реконштруцкію храмів, народных културных памяток

Ґрантовый проґрам Пряшівского самосправного краю (ПСК) Вызва про реґіон уможнив реалізацію далшых проєктів заміряных на обнову обєктів памятковой вартости.

Край найновіше поміг сохранити народны културны памяткы в Шамброні, Осаднім, Брезовічці ці Камюнці. На проєкты дав веце як 88 тісяч евр.

Як інформовало Одділіня комунікації і пропаґації ПСК, на теріторії краю ся вдяка крайскій самосправі зреалізовали далшы смыслуповны проєкты заміряны на обнову културных памяток. Окрім іншого і вселах Шамброн, Осадне, Брезовічка і Камюнка. Проєкты заміряны были на санацію і оправу веж памятковых обєктів, їх інтерьєру і просторів коло храмів.

ПСК дав грошы на тоты проєкты з Вызвы про реґіон, з проґраму Підпора обновы културных памяток UNESCO і народных културных памяток.

Народна културна памятка – Ґрекокатолицька церьков Покровы Пресвятой Богородіці в Шамброні із 1872-го року має выновлены муры. Роботы проходили почас літа, край дав на реалізацію дотацію в сумі 20 тісяч евр.

Реконштрукційов перешла і народна културна памятка – Православна церьков Вознесенія Господа в Осаднім з року 1930. Храм є знамый свойов унікатнов кріптов вояків з Першой світовой войны. Інтерьєр потребовав реконштрукцію. Розпис на стінах ся механічно очістив, зафіксовав, наслідно ся проблематічны пуклины выповнили інъєктажнов малтов. Зробила ся і сілікатова пенетрація а реновачне натертя. ПСК дав на проєкт 23 800 евр.

В Брезовічці ся реалізовали роботы на народній културній памятці – Римокатолицькім костелі святого Мартіна з Турс. Храм є з кінця 13-го столітя. Вежа той оріґінално ґотічной будовы, котра в році 1713 барокізовала ся, перешла потрібнов обновов. Уможнила то крайска дотація в сумі понад 24 600 евр.

Обновлена є і културна домінанта в селі Камюнка. На памятковім обєкті – Ґрекокатолицькій церькви святых апостолів Петра і Павла з року 1790, обновила ся фасада, але і інтерьєр. Роботы проходили і коло церькви а край на тот проєкт дав 20 тісяч евр.

Крайска самосправа у 2022-і році посередництвом Вызвы про реґіон і їй проґраму Підпора обновы културных памяток UNESCO і народных културных памяток підпорила 23 проєктів в цілковій сумі 940 тісяч евр.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА