Сумар дня на 3. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 3. листопада/новембра 2022 р.

В вікенд ХV Стрічы Трьох Поколінь

Припоминаме, што уж в найблизшу суботу зачнут ся ХV Стрічы Трьох Поколінь з Лемківском Культуром. Подія того рока буде дводньова – 5. листопада/новембра пройде в Пшемкові, а 6. листопада/новембра в Шпротаві. Дотеперішні едициі стріч все проходили лем в Пшемкові. Як інформувал нашу редакцию Євген Габура з Кружка Стоваришыня Лемків в Пшемкові, головного орґанізатора подіі – буде она проходила на фоні упамятнінь 75. річниці Акциі «Вісла». Выступы ансамблів будут навязувати до той річниці. Окрем того буде вказана выстава посвячена тій траґічній подіі в істориі Лемків. Окрем Ластівчат і Ластівочкы запрезентуют ся і інчы запрошены колективы. Як додал Габура, дотля традицийом было, што орґанізаторы до остатньой хвилі не подавали, якы ґрупы выступлят, зато буде пару несподіванок. Радийо ЛЕМ.фм тримат медияльный патронат над подійом. Початок обох концертовых дни о 16.00 год.

Локальны выборы на Словациі

В суботу, 29. жолтня/октобра, проходили на Словациі першый раз разом крайскы і комунальны выборы. В Пряшівскым Самосправным Краю, де жыє найвеце Русинів в рамках Словациі, жупаном надале остає Мілян Маєрскій (KDH, Sme rodina, SaS, Za ľudí). Найвекшом конкуренцийом для него был Михал Калиняк, Русин з Меджелабірців (Hlas – sociálna demokracia, SMER – SD, SNS, SZÖVETSÉG – ALIANCIA). Хоц чысло голосів в порівнаню з баданями преференций перед выборами Калинякови ся збільшыло, не старчыло того, і по 5-річным мандаті дальшу каденцию має Маєрскій. Калиняк здобыл 31,39% голосів, Маєрскій отримал 42,01%. Калиняк не был успішный як кандидат на жупана, але здобыл найвеце голосів зо вшыктых кандидатів зо вшыткых окресів на посланців ПСК. З рахунком своіх голосів є реальным кандидатом на віцежупана.

Засідал Собор Єпископів ПАПЦ

25. жолтня/октобра засідал Собор Єпископів ПАПЦ. Перед парома днями на офіцияльным сайті Церкви явил ся комунікат Собору в звязку з піднятыма рішынями. Окрем зовнішніх тем, владыкы рішыли тіж внутрішні справы, в тым тоты тыкаючы парохій, до котрых приналежат Лемкы. Схвалено м.ін. загальномитрополитарны збіркы грошів на потребы двох осередків на Лемковині: парохіі в Команчы (колекта одбуде ся в маю 2023 р.) і Святой Горы Явір (збірка фондів пройде в липци/юлию 2023 р.). Окрем того, в червци/юнію будучого рока одбуде ся загальнопольска збірка на єдну з найбільшых лемківскых парохій на чужыні – в Пшемкові на Нижнім Шлеску. Єпископы приняли тіж м.ін. текст роджественного посланя, ци рішыли, што Свято Православной Молодежы одбуде ся в 2023 р. в Варшаві, а в 2024 в Кракові.

Варштаты іконописаня в Любіні

В днях 14.-19. листопада/новембра православна парохія св. Тройці в Любіні орґанізує варштаты іконописаня. Вюл іх буде іконоґраф, о. Павел Заброцкій. Кошт варштатів то 700 зл, чысло місц єст ограничене. Записы мож робити контактуючы ся з парохом любіньской церкви, о. Богданом Репелом (телефон і майль найдете на вебсайті парохіі). Любін в попередніх роках был уж ґаздом подібных подій. Вшыткы занятя будут ведены на любіньскым приходстві. Парох вєдно з вірныма просят і на другу подію, котра одбуде ся 4. грудня/децембра – Свято Копальників. В тот ден торжественну літургію очелит владыка Юрий, архіпастыр вроцлавско-щеціньской єпархіі ПАПЦ. Деталі найдете на нашым сайті.