Пряшівскый край поведе Маєрьскый. Председа РОС в крайскім парламенті

В суботу 29-го октобра 2022-го року проходили на Словакії першый раз споєны крайскы і комуналны выборы. В Пряшівскім самосправнім краю (ПСК), де жыє найвеце Русинів в рамках Словакії, зіставать жупаном Мілан Маєрьскый (KDH, Sme rodina, SaS, Za ľudí).

Найвекшов конкуренційов му быв Михал Калиняк, родак з Меджілаборець (Hlas – sociálna demokracia, SMER – SD, SNS, SZÖVETSÉG – ALIANCIA). Но хоць му кількость голосів в порівнаню з баданями преференцій  пред выборами наросла, не старчіло то, і по пятьрічнім мандаті буде далшы штири рокы председом ПСК Маєрьскый.

Калиняк бы міг быти віцежупаном

На початку рахованя голосів в суботу вечур куртый час вів Михал Калиняк, но было ясне, же порахованы суть лем малы села і вєдно з выслідками векшых сел і міст ся буде сітуація мінити.

Наконець Калиняк здобыв 31,39 процента голосів, причім староновый жупан Маєрьскый мав 42,01 процента. Розділ меджі фаворізованыма кандідатами быв понад 10 процент, причім многы думали, же і кедь выграть Маєрьскый, розділ буде тіснішый.

Маєрьскый ся такой в ночі подяковав на соціалній сіті голосуючім, же дали „Пряшівскому краю шансу быти досправды гордым Выходом,“ і написав, же собі щіро цінить каждый єден голос. Жупан бере далшый мандат як „великый обовязок дале хоче намісто бісідованя безпрестайно робити і приносити резултаты про ліпшый жывот людей в рамках цілого краю.“ Так само акцентовав, же є притоволеный наповно в тім продовжовати.

Калиняк по півночі зо суботы на неділю признав прогру, і потвердив, же вже телефоновав з Маєрьскым і поґратуловав му ку перемозі.

Но хоць не быв успішный як кандідат на жупана, здобыв безконкуренчно найвеце голосів із вшыктых кандідатів зо вшыткых окресів на посланців ПСК. З чіслом голосів 12 460, котры здобыв за окрес Пряшів а кількостьов посланців, котры ся за тоту саму коаліцію дістали до крайского парламенту, і котрым бракує лем трьох людей, жебы мали точну половину заступистельства ПСК, є реалным кандідатом на віцежупана.

Вопросом є, ці Калиняк схоснує свій мандат і посадить ся до крайского парламенту, або верне до Здружіня міст і сел Словакії з тым, же далше буде занимати ся самосправов як фаховець.

Пріматоры в нашых реґіонах

Посмотрили сьме ся і на то, якы резултаты принесли выборы на позіціях пріматорів міст в нашых реґіонах.

В Меджілабірцях здобыв знова мандат дотеперішній пріматор Владислав Вышньовскый (Hlas – sociálna demokracia, SMER – SD), котрый мав аж 70,52 процента голосів. До містьского заступительства там кандідовав і наш молодый актівіста а председа обчаньского здружіня Лабірьскы Русины Александер Грічко (SaS), но не перешов.

Свідник так само продовжує зо старновов пріматорков Марцелов Іванчовов (Hlas – sociálna demokracia, Sme rodina, KDH), котра здобыла 48,55 процента голосів. У Свіднику кандідовав і Мілош Стрончек, котрого знаме як нашого актівісту, председу Окресной орґанізації Русиньской оброды у Свіднику а орґанізатора Русиньского фестівалу. Но здобыв лем 3,86 процента голосів.

Потішуючім фактом є, же молодый русиньскый актівіста Станіслав Гвозда, котрый кандідовав на містьского посланця, здобыв мандат і быв пятый найуспішнішый подля чісла голосів.

Бардейов і далше буде вести як пріматор Боріс Ганущак, котрый є довгы рокы уж як кебы неогрозительным монархом. Пріматором є од 1999-го року і здобыв мандат на далшы штири рокы, кедь му дало голос 47,42 процента людей.

В Бардейові знова обгаїв мандат містьского посланця і Мілан Ян Піліп (незалежный кандідат), член Выбору про народностны меншыны і етнічны ґрупы, председа Уряду про Словаків жыючіх в загранічу а член презідії Округлого стола Русинів Словакії.

В Снині є на посаді пріматора зміна. Даніела Ґаландова не обгаїла свій мандат, котрый дістала перед штирьома роками. Новым пріматором став Петро Волошин (KDH), котрый здобыв 41,14 процента голосів.

Стара Любовня продовжує з пріматором Любошом Томком (незалежный кандідат), котрый здобыв 73,77 процента голосів. І в Гуменнім зіставать пріматором Мілош Мерічко (незалежный кандідат), котрому дало голос 50,14 процента людей.

У крайскім парламенті і люди з русиньского руху

Окрім Михала Калиняка, котрый здобыв мандат посланця ПСК, а котрого можеме знати і з русиньского руху, і далшы люди актівны в русиньскых справах здобыли мандаты посланців.

За окрес Стара Любовня буде посланцьом ПСК Мартін Караш, председа Русиньской оброды на Словеньску, котрый знова обгаїв і мандат посланця містного заступительства в селі Камюнка. За тот самый окрес буде крайскым посланцьом актівный наш староста Михал Дідік (незалежный кандідат), котрый тыж обгаїв свій старостовскый мандат в селі Чірч.

За Свідницькый окрес быв выбратый за єдного з трьох посланців ПСК того окресу Михал Ільканин (незалежный кандідат), котрый є предностом Окресного уряду у Свіднику, а знати го можеме і як бывшого актора Театру Александра Духновіча в Пряшові.

Фото: TASR.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА