«Говорить Пряшів» – пятниця, 18.10 год.

Долгій вікенд! Вкінци сме ся дочекали. Кому долгій – то долгій. Може не каждый си робит в понедільок выхідне і буде ся лінил через цілы штырі дни.

Но, признам щыро, же в радию аж так легко не єст. Бо мы вільне маме лем товды, коли вшыткым дают – 1. лиостопада/новембра. А в понедільок треба робити – новины і авдициі нажыво. Такій етнобізнес полном ґамбом.

А переходячы до поважных справ, то анонсуєме, што днес нашым целебритом буде лексикоґраф, писатель і тлумач з Підкарпатя, Ігор Керча. В «Книжници.фм» почуєме творчіст Гавриіла Костельника під назвом «З мойого валала».

«Перличка» то дальшый раз выімкы з ґазеты «Недѣля» – дознаме ся, як ся забезпечыти на зиму. Думам, же тема актуальна, коли в Польщы мати угель до пеца – значыт быти богачом.

А «Припомінка»? Ту задумаме ся над тым, як язык про нарід важный. Каждый нарід, а особливо малы народы, як наш русиньскій (лемківскій).