Сумар дня на 26. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 26. жолтня/октобра 2022 р.

Дорога Новый Змигород – Крампна вкінци без дір?

Девятый рік тырват перебудова воєвідской дорогы но 992 на одтинку од Нового Змигороду в страну Крампной. До днес тырват конкурс оферт на ремонт знищеных одтинків дорогы на штырьох фраґментах в Контах і Крампній. Конкурс оферт оголосил Підкарпатскій Заряд Воєвідскых Доріг в Ряшові. По выграню оферты дана фірма буде мусіла выробити ся з ремонтом до 22. грудня/децембра тр.

Жытелі Ізб і Баниці познавали культуру Лемків

Стоваришыня Ляцкова од мая до жолтня/октобра тр. реализувало проєкт «Пастырска акрадия нашых предків – вертаня до джерел», што приближал жытелям Ізб і Баниці культуру Лемків, Бойків і Волохів. За обшыр заінтересуваня проєкту взяли Низкій Бескід, Пєніны та Бєщады. Зреализуваных было сім ініциятив, в якы заанґажуваны были молодіж і старшы жытелі сел. В рамках кулінарных варштатів участникы выпікали на лопаті в хлібовым пеци хліб з кіста на заквасі, робили масло, сыр. Вшытко, што зрыхтували, взяли як мериндю на прогульку в Бєщады, котру зачали од візиты в Школі Ремесла в Угерцях. Перешли ся тіж долином по неістнуючым бойківскым селі Цариньскє. В дальшій части проєкту зорґанізуваны были артистичны варштаты – елементы писаня ікон і прінту – малюваня на полотні, а тіж театральны і музичны варштаты. Попроєктову выставу мож обзерати в Центрі Туристичного і Культурового Продукту Ґорлицкого Бескіду, што находит ся в Высовій.

Будут споминати будівничого основ літературы Русинів Войводины – Михала Ковача

Уж заран 27. жолтня/октобра в місцевости Бікіч Доль в Сербіі заплянували літературный вечер з нагоды 113. річниці народин учытеля і писателя Михала Ковача. Стріча пройде о 18.00 год., а в єй проґрамі є презентация фраґментів прозы Михала Ковача, выступ співочой ґрупы Бікічанкы та выступ діти, што вчат ся русиньского языка. Михал Ковач жыл в роках 1909-2005. Был педаґоґом, белетристом, редактором та культурным діячом серед войводиньскых Русинів, автором підручників для русиньскых шкіл в Войводині. Сучасны критикы уважают, што Михал Ковач є будівничым основ літературы войводиньскых Русинів. Є автором поезиі, оповідань, драм, комедий, романів. Творы Ковача были тлумачены на ріжны языкы, особливо держав бывшой Югославіі.

Догваріня медже Словацийом а Украіном

Як пoінформувала аґентура TASR, Украiна потвердила як пункт прилучыня плянуваной автострады D1 в части од села Бідовці ґу украіньскій граници перехід Вышнє Німецкє – Ужгород. Было то важне для опрацуваня документациі той части автострады. Частю єднаня была і кооперация сил на границях медже словацком і украіньском сторонами. Звекшеный товаровый рух на переході уж од долшого часу, іщы сперед войны, выкликує комплікациі і выдолженый час одправы. В понедільок 24. жолтня/октобра украіньска страна потвердила, што мают 1,2 млн евро на технічну поміч для переходу Ужгород – Вышнє Німецкє. Мают за тоты середкы м.ін. докінчыти перехід для особовых авт, што злегшыт товаровый транспорт. Другом справом є добудуваня одповідньой інфраструктуры.

Фот. www.ruskeslovo.com