Сумар дня на 18. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 18. жолтня/октобра 2022 р.

В ясельскым повіті буде ремонтуваный міст 

Іщы в вересни/септембрі Ясельскій Повіт отримал з Міністерства Климату і Середовиска промесу в высокости 720 тис. зл на ремонт мосту на повітовій дорозі Крампна-Жыдівскє-Граб. Пару років тому цілый одтинок дорогы был выремонтуваный. На жаль в 2021 р. пошкодженый был міст. Жебы часто не закрывати мосту, а што за тым іде тіж і дорогы, введено зміны што до вагы поіздів, котры можут з него корыстати. Од того часу власти повіту зачали старати ся о дофінансуваня ремонту. Уж в серпни/авґусті повіт закінчыл конкурс оферт і підписал умову з выконавцьом інвестициі, будовляном фірмом з Ясла. Згідні з пляном выремонтуваный міст буде готовый до хоснуваня в половині листопада/новембра того рока. Інвестиция реализувана єст разом з Державныма Лісами в рамках середків з Лісового Фонду.

Ліґниця, Любін і Ґлогів отримали дофінансуваня з Урядового Проґраму Стратеґічных Інвестиций

Нижньошлезскы самоуряды отримали дофінансуваня з Урядового Проґраму Стратеґічных Інвестиций в высокости 1 млд 300 млн зл в рамках Розвитку Промысловых Зон. З той квоты аж 917 млн зл трафило до самоурядів з обшыри Ліґницкой Специяльной Економічной Зоны. Фінансова підпора буде схоснувана м.ін. Містом Любін, Містом Ліґниця та ґміном Котла і ґміном Ґлогів, котры на реализацию спільного проєкту отримали найбільше дофінансуваня. Середкы тоты можут быти презначены м.ін. на розвиток транспорту, творіня новой сіти комунікациі, але тіж модернізацию або будову енерґетичного ци водного-канализацийного систему.

«Лісовы інспірациі» – вкаж красу малопольскых лісів

Реґіональна Дирекция Державных Лісів в Кракові просит до участи в XI едициі Малопольского Фотоґрафічного Конкурсу «Лісовы інспірациі». Тогорічна едиция проходит під гослом «Краса Ліса». Цілю конкурсу єст пошырювати серед діти і молодежы, але тіж дорослых, заінтересуваня і пошану для природы, а тіж вказати богатство малопольской природы, особливо лісів. Охочы прошены сут о пересланя, або особисте достарчыня знимок до 31. жолтня/октобра на адрес Реґіональной Дирекциі Державых Лісів в Кракові. Конкурс проходит в двох віковых катеґориях: діти і дорослы. Выріжнены в обох катеґориях отримают фінансовы нагороды. Додатково признана буде нагорода Директора Реґіональной Дирекциі Державных Лісів, 3-дньовый побыт для 2 осіб в Выпочынковым Осередку Радоцина, на обшыри Надлісництва Ґорлиці.

Утрудніня на трасі в Маґурскым Нацийональным Парку

Маґурскій Нацийональный Парк поінформувал, што в звязку з продолжаючым ся ремонтом роверовой пути на одтинку з Розстайного до Незнайовой траса дальше єст закрыта для пішого, роверового і кінного руху, аж до 30. жолтня/октобра. Комунікат направленый єст особливо на участників роверового райду орґанізуваного МНП, якій просит взяти до увагы закрытый одтинок при плянуваню райдовых трас. Припоминаме, што іщы до 15. листопада/новембра тырват біциґловый райд, в рамках якого треба переіхати мін. 10 км парковыма путями і удокументувати тото што найменше 5 знимками, зробленыма при характеристичных пунктах в Парку, і при помочы GPS . Пак документацию треба переслати до власти Парку і ждати на нагороды.