Сумар дня на 17. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 17. жолтня/октобра 2022 р.

XV Стрічы Трьох Поколінь з Лемківском Культуром

Стоваришыня Лемків просит на XV Стрічы Трьох Поколінь з Лемківском Культуром. Подія одбуде ся в суботу 5. листопада/новембра о 16.00 год в Пшемківскым Осередку Культуры, і о ден, в неділю 6. листопада/новембра о 16.00 год. в Шпротавскым Домі Культуры. На концерті запрезентує ся Лемківскій Ансамбль Пісні і Танця Ластівочка разом з запрошеныма гістми. В рамках подіі споминана буде і 75. річниця Акциі «Вісла». XV Стрічы Трьох Поколінь з Лемківском Культуром будут зреализуваны завдякы дотациі і спертю Міністерства Внутрішніх Справ і Адміністрациі, польковицкого повіту і м.ін. ґмін Любін, Польковиці, Пшемків і Шпротава. Медияльный патронат над подійом тримат і наша медияльна ґрупа ЛЕМ.фм.

Русиньска новинарка отримала Нагороду Медий

Як поінформувала аґентура Рутенпрес, іх колеґыня і новинарка Оля Русковскі отримала Нагороду Медий в конкурсі «Поправа положыня жен і дівчат в сельскых обшырях». Вручыня нагороды проходило в минулу пятницю, 14. жолтня/октобра, в Чачку в Сербіі, підчас конференциі «Позераня до будучности», яку орґанізувал Повірник дс. Охороны Рівности. Конференция тота одбывала ся в рамках Медженародного Дня Жен, як частина проєкту «Поправа положыня жен і дівчат в сельскых обшырях». Зреализувана была з підпором Аґенциі Зъєднаных Наций дс. родной рівности і зміцнюваня жен в Сербіі (UN Women) і Норвежской Амбасады в Бельграді.

Новый елемент спортово-рекреацийного комплексу на Чорным Потоці

В минулу суботу, 15. жолтня/октобра, на креницкым Чорным Потоці прошло одкрытя новой солянковой інгаляториі. То уж третя така інсталяция на обшыри ґміны Крениця. Нова інгалятория є частю спортово-рекреацийного комплексу на Чорным Потоці. В рамках розвитку комплексу курорт зреализувал в остатнім часі ремонтовы і будівляны роботы. Окрем солянковой інгаляториі жытелі можут тепер хоснувати м.ін. пляц забав, боіско, скейтпарк ци памп трак. Найбільшом інвестицийом было поглубліня корыта Чорного Потока і высыпаня при ним пісковой пляжы – атракция має притігати не лем літом, але і в зимовым періоді, м.ін. любителів морсуваня.

Русиньска музика на 32. Фольковых Миколайках в Люблині

В грудни/децембрі тр. в Люблині мож буде слухати лемківску музику. Од 8. до 11. грудня в Хатці Жака будут проходити 32. Фольковы Миколайкы. Цілю фестівалю єст популяризувати традицийну культуру через едукацию і заінтересуваня молодых люди вартостями і спадковином фольклору. Окрем концертів, што сут головным пунктом подіі, в рамах фестівалю проходят чысленны варштаты, авторскы стрічы, вказуваны сут фільмы звязаны з народном культуром. Презентувана єст музика інспірувана фольклором ріжных реґіонів і держав, з цілю переламувати стереотипы і упереджыня медже народами, через познаваня іх традициі і культуры. Тогорічный фестіваль зачне ся од медженародной науковой конференциі «Жыва традиция – дідовизна колективной достоменности», дальшы дни будут проходити концерты. Русиньску музику буде мож почути в суботу 10. грудня/децембра – выступит русиньскій музик Штефан Штец з ансамбльом та Оркєстра св. Миколая, яка ся в своій творчости часто інспірує лемківскым фольклором.