«Слово» – 18-та неділя по Сошествії Святого Духа – неділя, 9.00 год.

Чудесный лов рыб. Што нас учіть тота подія з днешнього Євангелія? Ісус приходить а проповідать, де зышло ся велике множество народа. Ісус выхоснує лодькы, котры суть порожні, рыбарі одышли полокати сіті.

Потім говорить Сіменови Петрови, спусть сіті до глубокой воды. Петро одповідать, тадь мы ся намагали цілу ніч а без успіху. З того людьскго погляду сі думам, же тото не мать жадный смысел тото робити. Тадь мы уж зунованы, страплены, перемочены. Но на твоє слово я тото зроблю.

А кедь так Петро зробив, кедь дав першенство слову Господа перед своїм властным арґументом скушесного рыбаря, поїмали велике множество рыб, же наповинли і далшы лодькы.

Так нам днешнє слово говорить о важности Божого благословліня. Ісус повів ясно: Без мене нич не можете зробити. Коли чоловік сполігать ся на свої силы, свою мудрость, свої способности, тогды спознать скламаня, неуспіх. Але коли буде веце вірити Божому слову як свойому розуму, як нас то учіть св. Василій, не будеме збаламучены.

В каждім нашім ділі выпрошайме собі Боже благословліня і Божу поміч. Най буде вшытко на Божу славу. Там, де є Боже благословліня, там ани ниякы прекажкы, першкоджіня, барьєры не зможуть нарушыти Боже діло. Але там, де суть вшыткы людьскы средства, але не є Божого благословіля, даремно є то намаганя.

Най нас поучіть в Старім завіті будованя Вавилоньской вежі, ці палаці імператорів, котры хотіли зничіти Боже діло – Церьков, теперь суть в руїнах. Але катакомбы, де ся ховали першы хрістіане, стоять і днесь.

Бо без Божого бласловіня є даремне наше намаганя. Коли Господь не будує дому, даремно намагають ся ставителі. Кедь Господь не хранить місто, даремно стоять на варті. Слава Ісусу Хрісту!

В неділю, 16. октобра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 16. октобра 2022 р. о 12.00 год. і 17. октобра 2022 р. о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА