Сумар дня на 13. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 13. жолтня/октобра 2022 р.

«Бескід без кіту. Зима» з номінацийом до Нагороды ім. Фердинанда Вспанялого

Як поінформувало Выдавництво Лібра PL, книжка Мариі Стшелецкой пн. «Бескід без кіту. Зима» была номінувана до Нагороды ім. Фердинанда Вспанялого. До нагороды было номінуваных 18 польскых выдань, печатаных в 2021 році. Місце акциі книжкы то зимова Лемковина в 20. роках ХХ ст. Прочытаме в ній о трьох дівчатках, котры жебы ратувати вітця – каменяря, рушают в богату в несподіванкы бескідску зимову подорож. Фоном для ней сут дика природа Бескіду і штоденне жытя лемківского села. Публикация єст богато ілюструвана одбитками дереворытів, што были вытяты авторком з бескідской зваленой липы. Нагорода Фердинанда Вспанялого то выріжніня для найліпшой дітячой книжкы минулого рока, признавана єст од 2016 рока. Єй цілю є промувати літературу, державных авторів і ілюстраторів. Треба спомнути, же Нагорода за 2019 рік была признана попередній книжці Мариі Стшелецкой пн. «Бескід без кіту».

Одновлены лемківскы памятникы в Мшані

Карпатскє Товариство поінформувало на своім вебсайті, што повело ся одновити памятникы на лемківскым цмонтери в Мшані. Влони стоваришыня інформувало о старанях шолтыс Евы Качмарек-Вєнцковской о ремонт старых лемківскых памятників з ХІХ ст., находячых ся на обшыри мшаньского церквиска і на цмонтери. Стараня шолтыс принесли позитивный ефект, кєд же завдякы згромадженым ньом фондам повело ся провести ремонт. Вшыткы стары памятникы на цмонтери были устабілизуваны і одновлены Шымоном Моджеєвскым з «Маґурича». На церквиску был поставленый осадженый в пісковцьовым моноліті ориґінальный крест, якій колиси вінчыл баню мшаньской церкви.

Рекордове чысло одвиджаючых в Выгорлятскым Музею в Гуменным

Выгорлятскій Музей в Гуменным закінчыл 30. вересня/септембра літній музейный сезон. Мимо пандемічных ограничынь в попередніх роках, інституция може ся похвалити в рамках тогорічного літнього сезону рекордовым чыслом одвиджаючых – експозициі виділо 27,412 осіб зо Словациі і заграниці, головно з Чешской Республикы, Польщы, Мадяр, але і зза моря. Порівнуючы з єднакым періодом минулого рока, чысло збільшыло ся о близко 14,5 тис. осіб, разом є высше як чысло одвиджаючых за цілый попередній рік. Як подала Яна Федічова, «музей тым потвердил добрі выбрану маркетінґову стратеґію ословліня люди музейным портфоліо подій, успішно закінчыл і обнову каштелю». Окрем постійных выстав музей притігал і ріжныма проєктами, подіями, концертами, творчыма варштатами ци фестівалями. Актуально музей рыхтує дальшы выставны проєкты, проґрамы про діти, подіі в обшыри істориі, традициі і культуры. Єдночасно музей рыхтує і новы публикациі, в тым календарьовы выданя.

Конкурс на становиско акторкы/актора Театру ім. Александра Духновича

Театр ім. Александра Духновича оголосил конкурс на становиско акторкы/актора (члена внутрішньой артистичной ґрупы). Серед вымагань находят ся тоты тыкаючы акторской гры, співу і танця, але окремо вымагане єст і знаня русиньского языка і азбукы. Участникы конкурсу мают прирыхтувати выбраный монолоґ в русиньскым языку і пісню. Зголошыня разом з CV мож слати до 24. жолтня/октобра. Дрібниці поданы сут на фейсбуковым сайті Театру.