На Дуклі припомянули собі Карпато-дукляньску операцію

Жертвы Другой світовой войны з нагоды 78-ой річніці Карпато-дукляньской операції і Дня героїв Карпато-дукляньской операції собі у четверь 6-го октобра 2022-го року припомянули при памятнику на Дуклі.

Як інформовала аґентура TASR, участныма были представителі штатной справы, самосправы, як і участници протифашістічного одбоя, вєдно із шыроков масов людей.

Операція великого значіня

„Тота операція має величезне значіня. То найвекша протифашістічна гірьска операція почас Другой світовой войны. Значнов міров, вєдно із Словацькым народным повстаньом, записала ся до історії цілой Европы. Тото місце є припомінков нелем історічных дій, але можливостьов припомянути собі і то, што діє ся на выход од нас,“ повів у приговорі державный секретарь Міністерства обороны Словацькой републікы Маріян Маєр.

За словами Михала Ільканина, предносты Окресного уряду в Свіднику, є слово мір днесь мало хосноване, і кедь є хосноване, та лем в теоретічній уровни.

Участным приговорив ся і директор Уряду екуменічной душпастырьской службы Озброєных сил Словацькой републікы Владимір Варґа, котрый ся з участныма помолив за героїв Карпато-дукляньской операції. Як повів, „нашы герої не роздумовали, а пожертвовали тото найцінніше, што мали. Свою молодость, здоровля, а часто і жывот.“

На пєтній спомині были притомны і участници протифашістічного одбоя Анна Берґерова, капрітан у выслужбі Владимір Стырмень, і поручік у выслужбі Браніслав Тварожек.

По пєтній події на Дуклі собі дії, котры одбыли ся перед 78 роками, припомянули положіньом вінців ку памятнику армадного ґенерала Людвіка Свободы і памятнику совітьской армії у Свіднику.

Дукля припоминать смілость і патріотізм

Подля презіденткы Словацькой републікы Зузаны Чапутовой Дукля припоминать нам днесь смілость і патріотізм нашых предків. Є сімболом, же каждый тоталітный режім скоріше або пізніше підлягне незломній людьскій тузі по слободі.

„Споминаме з вдяков і пєтов на ослободителів сперед 78 років. Єдночасно днесь, кедь недалеко нашых выходных граніць знова розгорів ся воєньскый конфлікт, собі знова із вшытков безодкладностьов усвідомлюєме, як величезнов цінностьов суть мір, слобода і покійный жывот – і як легко тоты діла можуть быти огрожены,“ сконштатовала презідентка.

Як додала, на Дуклю не забывать, хоць з причіны свойой участи на саміті презідентів в загранічу не могла тот рік брати участь на пєтных подіях.  Карпато-дукляньску операцію означіла за єдну із найвызначнішых і найдраматічнішых в рамках Другой світовой войны.

„Вызначно помогла ку поражці колаборантьского фашістічного режіму на Словакії, як і цілковій поражці німецького націзма в Европі.“

Карпато-дукляньска операція

Карпато-дукляньска операція была найвекшов і найкырвавішов битвов лінії выходного фронту, котра є повязана з теріторійов днешньой Словакії.

Войска Червеной армії і Першого чехословацького армадного корпусу під веджіньом ґенерала Людвіка Свободы почас ньой вели тверды бої з німецькым войском. Офензівна операція, котра мала споїти повстанецькы силы Словацького народного повстаня із совітьскыма войсками, тырвала од 8-го септембра до 28-го октобра 1944-го року.

6-ый октобер є на Словакії День героїв Карпато-дукляньской операції, записаный в календарі як памятный день. Першый раз святковав ся у 2016-ім році.

Фото: FB/Марцела Іванчова.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА