Сумар дня на 4. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 4. жолтня/октобра 2022 р.

Повселюдне списуваня жытелів в Сербіі і на Мадярах

Од початку жолтня/октобра тырват в Сербіі і на Мадярах повселюдне списуваня жытелів. Обі державы рішыли перенести спис на 2022 рік, хоц в більшости держав проходил він в 2021 р. Вшытко з причыны пандеміі і обовязуючых ограничынь. В Сербіі списуваня жытелів проходит лем в безпосередній формі, при участи комісарів, і тырвало буде до 31. жолтня/октобра. На Мадярах мож списати ся електронічно, але лем до 16. жолтня/октобра. Інтернетовый формуляр єст лем по мадярскы або анґлицкы, але на сайті Вседержавного Русиньского Самосправуваня находит ся його тлумачыня на русиньскій язык. Пак до 20. листопада/новембра мож буде ся списати лем при участи комісарів і буде товды доступна русиньса версия. На результаты треба буде пождати певно аж до 2023 р. В обох державах діют русиньскы орґанізациі і інституциі, котры прилучыли ся до кампаніі Сме Русины, веденій при списуваню тіж в Польщы, Словациі ци Хорвациі, і заохочают они списати ся Русином. На Мадярах, як і в Польщы, мож собі выбрати дві нацийональности.

Православна Парохія в Реґєтові просит о фінансову підпору при консерваторскых працах в святыни

Іде о штырі іконы, котры походят з І половины XX ст. Скорше находили ся они в іконостасі в реґєтівскій церкви побудуваній в 30. роках ХХ ст., єднак по выбудуваню новой святыні были перенесены. Як передал о. Ярослав Ґрич, настоятель парохіі, реґєтівскій храм отримал дотацию з Міністерства Культуры і Нацийональной Спадковины на реализацию проєкту пн. «Реґєтів, православна церков Михала Архангела, іконы (І пол. ХХ ст.): консерваторскы працы при штырьох намістных іконах з іконостасу». Іконы сут в злым стані і вымагают скорой консерваторской інтервенциі. Дотация з Міністерства выносит 30 тис. зл, але треба мати власный вклад – 9 тис. зл. На жаль, парохіі не стати на такій выдаток, зато разом зо своім парохом звертают ся з просьбом о підпору. На сайті zrzutka.pl находит ся колекта, де мож вплачати даткы на консервацию ікон.

Новый басен на Лемковині о крок ближе

Остатнього дня вересня/септембра війт ґміны Санкова Малґожата Малух підписала умову з презесом фірмы GRAND в справі будовы крытого басену в Санковій. Нову інвестицию побудуют при спортовым боіску, в місци, де два рокы тому ведено ґеотермальны досліджыня. Початково ґміна рахувала, што буде мож хоснувати ґеотермальны джерела до систему огріваня ґміны і побудуваня термальных басенів. На жаль, в час верчыня дослідникы нашли ґаз, котрый не дає можливости термальні хоснувати воду. Тепер ґміна хоче выкорыстати верчыня як вымінник тепла, котрый по части буде підгрівал воду в новым басені. Кошт інвестициі то близко 19 млн зл.

Свято в парохіі Воздвижыня Честного Креста в Рудній

27. вересня/септембра в парохіі Воздвижыня Честного Креста в Рудній прошло парохіяльне свято. Торжество зачало ся од богослужыня, в котрым участ взяли і священникы та вірны з околичных парохій. Не бракло тіж представників локальных самоурядовых власти ци представників освіты і КҐГМ. Тогорічны святкуваня были особливы, зато же як раз 35 років священничой службы одзначыл парох той же парохіі о. митр. др Дарий Цьолка. Як сам підкрислил, тоты більше як три декады то был час так щестя, як і Божого выпробуваня.