Сумар дня на 26. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 26. вересня/септембра 2022 р.

Вмер Гавриіл Бескід

В четвер, 22. вересня/септембра тр., вмер Гавриіл Бескід. Родил ся він в 1929 р. в Кошыцях. Был педаґоґом, культурно-освітнім діячом, публицистом, автором вельох статій, спілавтором Русиньскых народных календарів, автором книжок Вызнамны про Русинів і Николай Бескід на благо Русинів. Был членом Русиньской Оброды на Словациі і дальшых русиньскых орґанізаций, долгорічным председом Руского Клюбу 1923 і Русиньского Культурно-Освітнього Общества Александра Духновича. Гавриіл Бескід неперестанно борол ся за верніня Руского Дому в Пряшові до рук вшыткых Русинів. Активно брал участ в русиньскых форумах, Світовых Конґресах Русинів і науковых семінарах. Вєдно з дакотрыма членами русиньскых орґанізаций одвиджал занедбаны гробы вызначных Русинів. Орґанізувал науковы семінары, одкрывал пропамятны таблиці. Підтримувал молоду ґенерацию русиньскых активістів. Того рока Вседержавне Общество Русиньской Інтеліґенциі імени Антония Годинкы нагородило Гавриіла Бескіда Памятном премійом ім. Антония Годинкы за вызначну діяльніст в ділі сохраніня русиньской культуры. Вічна Йому Памят!

Кадровы зміны в вроцлавско-щеціньскій єпархіі

На інтернетовым сайті православной вроцлавско-щеціньской єпархіі явила ся інформация канцеляриі архієпископа Юрия о службовым руху. Зміны тыкают і лемківскых парохій. Зо становиска пароха православной парохіі Успіня Пресвятой Богородиці в Зимній Воді был звільненый з дньом 26. вересня/септембра о. Славомир Кондратюк. На його місце, на пароха в Зимній Воді был менуваный о. Адам Горбаль. О. Славомир Кондратюк был так само звільненый зо становиска Декана Любіньскочо Округу і зо складу духовенства вроцлавско-щеціньской єпархіі, з благословліньом архієпископа переходит до лодзіньско-познаньской єпархіі. Владыка Юрий подякувал священиикови за його вельолітню службу для вроцлавско-щеціньской єпархіі. На Декана Любіньскочо Округу был менуваный з дньом 27. вересня/септембра о. Любомир Воргач, парох православной парохіі Воскресіня Господнього в Ліґници.

Мушына хоче побудувати ґондольову колейку на Мальник

Як інформувало радийо РДН, Мушына єст штораз ближе реализациі будовы ґондольовой колейкы на Мальник. Тырват выкуп обшыри од приватных властителів. Жебы мож было внескувати о середовискове рішыня, треба іщы лем єдной ділянкы, на котрій мала бы ся находити підпора лыжного вытягу. Ґміна має уж ділянкы під выжню і нижню стациі, паркінґы і остатні підпоры. За бургомайстром Мушыны Яном Ґольбом, колейка на Мальнику притягне туристів не лем до Мушыны, але і Крениці, Пивничной і приграниных обшыри по словацкій страні. Подля плянів нижня стация колейкы мала бы ся находити в околици сенсоричных загорід в Мушыні і вести на гору Мальник, на якій возношена єст і видокова вежа.

Першы радийовы варштаты в Рускій Бурсі

Припоминаме, же уж в тым тыжни, в суботу – 1. жолтня/окторба, в будинку Руской Бурсы в Ґорлицях пройдут першы варштаты радийового кумшту для наймолодшых. Школіня для адептів радийового фаху зачне ся о 13.00 год. професийным розгрітьом голосу і ґамбы, пак участникы дознают ся, як зробити гавкаючого джінґля. А кєд найдут ся охочы молоды акторы, та вєдно з редакторами нашого радия награме радийове слуховиско. По школіню просиме на почастунок. Не маме віковых ограничынь. Родичів просиме присылати зголошыня до участи діти в варштатах на майльовый адрес radio@lem.fm.