Сумар дня на 16. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 16. вересня/септембра 2022 р.

ГКХ одкрыла в Снині новы просторы

В віторок, 8. вересня/септембра, Грекокатолицка Харіта Пряшів (ГКХ) офіцияльно одкрыла в Снині новы просторы Дому святого Пантелеймона, котры посвятил владыка Петро Руснак, апостольскій адміністратор Пряшівской Архієпархіі і братиславскій єпарха. На посвячыню присутны были і представникы Пряшівского Самосправного Краю, міста Снина і орґанізаций спілпрацуючых з ГКХ. Харіта зачала в новых просторах забезпечувати здравотну опіку хворым в обыстях через Аґентуру домашньой здравотной старостливости і социяльны порады посередництвом Социяльного Центра Снина. Подля ГКХ штораз веце люди потрібує домашню здравотну опіку, іде головно о хронічно хворых ци безвладных пациєнтів з онколоґічныма діаґнозами, сеньорів, але і молодшых. Од квітня/апріля тр. фунґує і Социяльный Центер Снина, якій безплатно помагат ріжным ґрупам жытелів в формі социяльных порад.

Шанса на реактивацию лыжного вытягу в Щавнику

Як подала «Ґазета Краківска», єст шанса, же нефунґуючый од давна лыжный вытяг в Щавнику буде урухомленый. Завдякы діяням власти ґміны Мушына повело ся уреґулювати квестиі власности. Дотля парох ріжных властителів той обшыри в Щавнику роками не могло ся добесідувати, зато од вельох сезонів обєкт нищіє. Може ся тото єднак одмінити, кєд же властитель терену коло выжньой стациі – громадянин Німец – догварил ся зо спілком Дві Долины в справі розрахуваня своіх належности. Завдякы тому достал право до нижньой стациі і терены при выжній стациі в Щавнику. Заряджаючый спілком Дві Долины передал терены і ґміні Мушына – лыжну трасу, вытяг і функцию насніжаня. Значыт буде тепер двох властителів, громадянин Німец і ґміна. Бургомайстер Мушыны Ян Ґольба повіл, же неґоцияциі з другым властительом прошли без ниякых проблемів і рахує, же ся добесідуют. Реактивуваня вытягу было бы для Мушыны великом шансом на туристичный і економічный розвиток.

Завершены інвестициі в Креници

В Креници завершены три великы інвестициі спілфінансуваны з европейскых середків. Дві з них были зреализуваны в рамках Курорту Крениця – ревітализациі Бульварів Дітля і Головной Плыты Дептака. Третя інвестиция то будова Загорід Сил Натуры на Парковій Горі. Кошт реализациі вшыткых трьох задач то близко 35 млн злотых.

Концерт Терочкы в рамках Культурных Стріч в Раділувці

Уж заран, в суботу 17. вересня/септембра на Підляшы в ґміні Мельник буде мож почути лемківску музику. Культурны Стрічы в Раділувці одкрыє перехід через село з пісньом і музиком. Пак на концерті в сельскій світлици запрезентуют ся студийо фольклору підляшскых Білорусинів Жемерва, фольклорный ансамбль Полішуків Криніченька і Роман Арлов з Білоруси. З лемківском музиком выступит наш Ансамбль Руской Бурсы Терочка. В проґрамі заплянувана єст і стріча з ведучым Товариства Любителів Поліся і Бялкова, презентация чергового чысла часопису «Мельницкій Гостинец» та кєрмеш книжок. Орґанізаторами подіі сут Стоваришыня Малой Отчызны в Студзіводах, Шолтыс і Рада Шолтыства села Раділувка та Ґмінный Осередок Культуры, Спотру і Рекреациі в Мельнику. Подію дофінансувало МВСіА в рамках Білорускых культурных діянь на надбужаньскій земли.