Сумар дня на 15. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 15. вересня/септембра 2022 р.

Зміны в мальчыцкій парохіі

Як інформує вроцлавско-щеціньска єпархія ПАПЦ, в першу неділю вересня/септембра в парохіі в Мальчыцях одбыло ся попращаня дотеперішнього пароха, о. Адама Горбаля, і привитаня нового настоятеля о. Павла Ґоцко. Як сме скорше інформували, архієпископ Юрий рішыл своім декретом змінити пароха в мальчыцкій парохіі. О. Адам Горбаль был дотепер і остал надале парохом оддаленой од Мальчыц близко 70 км церкви в Михалові. Одходячому священникови подякували м.ін. представникы парохіяльной рады, староста Михал Корбич разом з віцеведучым ревізийной комісиі Петром Коробчаком. О. Горбальови подякували і діти, якых два рокы вчыл Закону Божого і лемківского языка. Парохія в Мальчыцях то лемківска парохія на землях выгнаня. Творят єй в більшости потомны выгнаных Лемків з Баниці (ґміна Устя Рускє). Перше богослужыня было одслужене 7. квітня/апріля 1949 р. в оддаленым пару кілометрів од Мальчыц Вільчкові.

Концерт лемківской музикы на Высoкій

В суботу, 24. вересня/септембра, на Высокій коло Рудной одбуде ся концерт пн. «Лемківскє співаня». Подія зачне ся о 15.00 год. В проґрамі выступы такых ансамблів як Розтока, Кычерка, Осетнополяне, Сасанка, Дамир і Надія. Забаву під конец дня заграт ґрупа Вороны. Вчас подіі буде мож посмакувати традицийну лемківску і ґрузиньску кухню. Буде тіж зорґанізувана выстава традицийного лемківского облечыня. Высока то село на Нижнім Шлеску, в котрым по 1947 р. прожыват вельо лемківскых родин, выгнаных м.ін. з Боґушы.

Ельпіс продолжат ратувати стары церковны книгы

Як інформує Єпархіяльный Осередок Православной Культуры Ельпіс в Ґорлицях, в текучым 2022 р. осередок продолжат консерваторскы працы колекциі церковных стародруків, будучых частю колекциі Осередка. Тогорічны задачы зосереджают ся на реконструкциі Євангелиі з 1665 р., Октоіха з 1671 р. та Ірмолоґіона з 1885 р., якы были друкуваны во Львові. На сайті ґорлицкого Осередка Ельпіс найти мож знимкы, што документуют стан книжок сперед косервациі, вчас іх модернізациі і по проведеных роботах. Продолжыня проєкту ратуваня старых церковных книг, якы в більшости походят з лемківскых церкви, є можливе завдякы дофінансуваню Міністерства Культуры і Нацийональной Спадковины.

Одбыло ся посвячыня церкви в Осадным

В минулу суботу, 10. вересня/септембра, одбыло ся посвячыня Церкви Вознесіня Господнього в Осадным на Пряшівскій Руси, котра перешла великій ремонт інтерєру. В Осадным остатній раз служыли ся богослужыня 5. червця/юнія того рока на храмовый праздник – одпуст. Церков в Осадным є нацийональном культурном памятком і реконструцкия, котра проходила три місяці, была реализувана за згодом Памяткового Уряду в Пряшові. Окрем стін в середині храму, была зроблена м.ін. і нова електрифікация ци центральне огріваня. Одновило ся і озвучыня обєкту. Ремонт підпорили сумом 23,800 евро посланці Пряшівского Самосправного Краю в рамках проєкту, але і дальшы жертводавці. Церков по ремонті посвятил архідекан про окресы Снина і Гуменне прот. Ігор Кереканич, а спілслужыли му дальшы отці, в тым парох, о. Сорока. Священник надіє ся, што в будучым поведе ся зробити ремонт храму ззовни.