В Меджілабірцях одкрыли деревяну пластіку Духновіча

5-ый септембер 2022-го року быв на Словакії першым дньом в новім школьскім році. Основна школа Духновічова в Меджілабірцях го зачала торжественно. В ареалі школы была одкрыта деревяна пластіка Александра Духновіча з двома школярями.

Пластіку русиньского будителя, котрой автором є академічный скулптор Юрай Чутек, подаровала місту Меджілабірці Фундація деревяна церковця Габура.

Фундація тот рік орґанізовала в Габурі вже 4-ый рочник Скулпторьского сімпозія Олены Мандіч – Шіналі, на котрім брало участь десять скулпторів із Словакії а Чеськой републікы. Пластіка Юрая Чутека выникла якраз почас сімпозія, котрый почав 23-го авґуста і закончів ся днесь.

На торжественнім одкрытю за участи школярів Духновічовой школы были присутны і далшы гості. Подію приговором одкрыв директор школы Іван Штефанко. За Фундацію деревяна церьковця Габура приговорив ся Душан Завацькый, місто репрезентовав пріматор Владислав Вышньовскый.

Пріматор дітям припомянув, же памятать часы, коли Русины не годны были голосити ся ку своїй народности, наперек тому, же добрі познали слова Духновічово стиху Вручаніє. За словами пріматора і тота скулптура має быти потверджіньом, же Меджілабірці суть русиньске місто і жыють в нім Русины, котры уж днесь можуть ся слободно голосити ку свому походжіню.

На події брав участь і ґрекокатолицькый парох із Олькы, отець Мілан Ясик, котрый є бывшый школярь той школы. Пластіку отець Ясик посвятив. За Русиньску оброду на Словеньску приговорив ся Володимір Противнял.

О авторови

Академічный скулптор Юрай Чутек (р. 1957) є родаком із Жіліны. Выштудовав Середню умелецьку-промыслово школу в Братіславі, пак академічный тітул здобыв на Высокій школі умелецько-промысловій у Празі, де штудовав у професора Малейовского і у професора Свободы.

Замимать ся переважно коморнов і монументалнов пластіков, творіньом інтерьєрів, так само креслить і малює. Свої творы выставльовав на Словакії, в Чеській републіці, Швейцарії, Голандії, Німецьку, Франції, Італії і Ізраілю. Належыть ку найоріґіналнішым словацькым вытварникам свойой ґенерації.

Фото: FB / Місто Меджілабірці.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА