Сумар дня на 5. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 5. вересня/септембра 2022 р.

Праздник св. Максима Ґорлицкого

Днес о 5.00 рано зачало ся православне поломництво з нагоды праздника покровителя перемышльско-ґорлицкой єпархіі – священномученика Максима Ґорлицкого, орґанізуване єпархіяльным Братством Православной Молодежы. Праздник св. Максима припадат на 6. вересня/септембра. Тогорічне поломництво зачало ся о 5.00 рано св. Літургійом в церкви Покровы Пресвятой Богородиці в Ждыни, де св. Максим был хрещеный. Дале траса іде через Ґладышів, Маластівску Маґуру, Прислоп, Новицю, Білянку, Шымбарк і Ропицю, аж до Ґорлиц. Торжества зачынают ся уж днес од правленой в катедрі св. Тройці в Ґорлицях Всеночной. Заран, в ден свята, о 6.00 год. буде служена ранішня св. Літургія, пак о 8.30 акафист перед мощами св. Максима. По привитаню владык, о 10.00 год. зачне ся Божественна Літургія.

9. Літературный Конкурс Мариі Мальцовской

Од 2. вересня/септембра до 25. листопада/новембра тырват 9. едиция Літературного Конкурсу Мариі Мальцовской на найліпшы творы в обшыри поезиі, прозы, есеів і драмы в літературным русиньскым языку. Конкурс є орґанізуваный Сполком Русиньскых Писателів Словациі во спілпрацы з Академійом Русиньской Культуры Словацкой Республикы і Інститутом Русиньского Языка і Культуры Пряшівского Університету. Зголошувати до участи в конкурсі мож ориґінальны літературны творы, якы мают од 10 до 20 сторін тексту, дотепер ниґде непубликуваны. Дрібниці про зголошыня сут поданы на інтернетовым сайті орґанізатора акциі. Зголосити свій текст може каждый автор од 18. рока жытя жыючый на Словациі. Конкурс єст анонімовый, зато особовы даны автора мусят ся находити в додатковій заклиєній коперті – будут они одкрыты аж по оцініню конкурсовых творів. Выголошыня результатів конкурсу пройде в половині грудня/децембра тр. Найліпшы творы будут оцінены і опубликуваны в часописі «Русин».

Поступує будова православной церкви в Ґладышові

Тырвают працы при будові православной церкви в Ґладышові. Деревяный храм є будуваный на взір уж неістнуючой церкви святых Космы і Даміяна з Незнайовой. Православна парохія св. Йоана Крестителя в Ґладышові фурт просит сперти будову. Жертву на тоту ціль мож передати м.ін. через колекту на сайті zrzutka.pl, paypal, або банковый трансфер. Конструкция церкви єст ставляна з перше зрыхтуваных деревяных сеґментів. На фундаментах святыні сут уж кладены деревяны белькы, зачынат ся вказувати зарис конструкциі. Дальшы працы, якы сут плянуваны на тот тыжден, будут вымагати схоснуваня двигу. Актуальны знимкы вказуючы поступуючу будову церкви мож обзерати на фейсбуковым сайті про чын будовы православной церкви в Ґладышові.

Каменярскы варштаты на Лемковині

Од днес до 10. вересня/септембра тырвают каменярскы варштаты орґанізуваны Лемківскым Ансамбльом Пісні і Танця «Кычера». В тогорічній едициі працы проходят на цмонтери в Лабовій, але окрем того першыраз діяня сут розшырены о стары лемківскы памятникы на цмонтери в Чырній. Тоты, якы хотят сперти акцию веце як єден ден, прошены сут о контакт з орґанізаторами. Завдякы дотеперішнім таборам повело ся упорядкувати і одновити більшіст памятників на лабівскым цмонтери, якій іщы перед парома роками был в плянах до ліквідациі. Находят ся на ним прекрасны памятникы і то єден з найбільшых нашых цмонтерів в тій части Лемковины.