ПСК схвалив про Ублю грошы на біціґльову стежку

Посланці Пряшівского самосправного краю схвалили на своїм засіданю у віторок 30-го авґуста 2022-го року дотацію про місто Пряшів і село Убля, Сниньского окресу. В селі ся вдяка дотації выбудує біціґльова стежка.

Про Ублю была з бюджету крайской самосправы схвалена фінанчна алокація в сумі 100 тісяч евр. Село фінанції схоснує на выбудованя біціґльовой стежкы про розвиток черезгранічного турістічного руху, і то в рамках першой етапы.

Цільом проєкту є выбудованя і зъякостніня ціклотрас в Народнім парку Полонины і в пригранічній теріторії, котра спаять Словакію і Україну. По реалізації будуть створены обставины про розвиток турістічного руху, підпору ціклотурізму і мягкой турістікы в сниньскім реґіоні.

„Проєкт выбудованя біціґльовой стежкы в селі є важным і в повязаню з будованьом ціклотрасы Poloniny Trail, котра актуално належыть меджі нашы найвызначнішы проєкты в Пряшівскім краю. З погляду стімулованя інвестіцій і векшого інтересу о тоту турістічно цінну теріторію то береме за далшый конкретный крок, котрым хочеме помочі дотягнути сполочны планы до успішного кінця,“ повів председа Пряшівского самосправного краю Мілан Маєрьскый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА