Сумар дня на 29. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 29. серпня/авґуста 2022 р.

Праздник св. Максима Ґорлицкого

Уж о тыжден православны Лемкы зыйдут ся в Ґорлицях з нагоды праздника покровителя перемышльско-ґорлицкой єпархіі – священномученика Максима Ґорлицкого. Іщы до кінця того тыжня мож ся записувати до участи в пятым пішым поломництві орґанізуваным єпархіяльным Братством Православной Молодежы. Праздник св. Максима припадат на 6. вересня/септембра. Поломництво зачне ся ден перше, в понедільок 5. вересня/септембра о 5.00 рано св. літургійом в церкви Покровы Пресвятой Богородиці в Ждыни, де св. Максим был хрещеный. Пак вандруючы через Ґладышів, Маластівску Маґуру, Прислоп, Новицю, Білянку, Шымбарк, Ропицю, поломникы дойдут до Ґорлиц. Там о 17.00 год. в ґорлицкій катедральній церкви буде служена святочна Всеночна. Вшыткы охочы взяти участ в поломництві прошены сут о контакт до 3. вересня/септембра до Наталиі Урды, Фомы Болеха або о. Юлияна Феленчака.

В Вапенным буде стежка в коронах дерев

В Вапенным выбудуют стежку в коронах дерев. Будова стежкы была плянувана уж од давна. В тым році ґміні Санкова повело ся достати на тоту ціль дофінансуваня в высокости 5 млн злотых. Середкы походят зо специяльного фонду в рамках Польского Ладу, якій направленый єст на вшыткы здройовы ґміны в Польщы. Стежка має чыслити ок. 300 метрів. За Малґожатом Малух, війтом ґміны Санкова, не буде то така стежка як в Солотвинах, але добрі впише ся в іхню оферту. Спільні з выконавцьом проєкту повело ся уж рішыти локализацию стежкы. Має то быти одсепарувана простір в лісным комплексі, яка позволит одкрыти панораму на більшый терен.

Громадяньскій Буджет Ґорлиц пройде пізнійше

Громадяньскій Буджет Ґорлиц пройде пізнійше як в плянах. Жытелі будут мочы складати своі проєкты о два тыжні. Пропозициі мают тыкати змін, якых ждут на обшыри свойого міста. Так як влони, до диспозициі Ґорличан єст 900 тис. злотых. Зголошувати мож задачы загальномістны, о вартости до 300 тис. злотых, і осільовы проєкты, якых кошт не векшый як 50 тис. злотых. До кінця вересня/септембра можут іх складати жытелі од 16 рока жытя. По тым терміні проєкты будут зверифікуваны, а пак вшыткы жытелі будут мочы на них голосувати. Як в попередніх роках, зреализуваны будут тоты з найвекшым чыслом голосів.

Послідній тыжден вакацийных активности в МНП

Маґурскій Нацийональный Парк просит до участи в посліднім тыжни вакацийных активности. В середу, 31. серпня/авґуста, в Едукацийно-Музейным Осередку МНП в Крампній пройдут уж остатні в тым році літні природничы варштаты для діти. Як перше, занятя сут дармовы, треба ся лем на них скорше записати. В посліднім тыжни серпня працівникы Парку зрыхтували для дорослых і родин вынятково аж дві вакацийны прогулькы по Парку. Перша, заран – 30. серпня/авґуста, выстартує в Фолюшы, о 10.00 год. Парковый едукатор буде додатково присутный на трасі природничой стежкы «Фолюш» од 9.00 до 15.00 год. Друга з прогульок буде в середу – 31. серпня/авґуста. Старт о 9.00 год. при цмонтери в Жыдівскым. Парковый едукатор буде додатково присутный на трасі Жыдівскє – Высокє – Жыдівскє в год. од 9.00 до 14.00. Участ в активностях єст безплатна, але тоты, што ідут на прогульку до Парку, мусят заплатити вступне.

Джерело фотоґрафіі: https://www.facebook.com/BMPDPG (авт. Домініка Ковачевіць, Якуб Антонович, Фома Болех)