Сумар дня на 22. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 22. серпня/авґуста 2022 р.

Літні Семінары 2022

Карпаторусиньскій Дослідничый Центр просит на Літні Семінары 2022, ведены John and Helen Timo Foundation. Зачнут ся они уж о тыжден, 29. серпня/авґуста, і будут проходити од понеділька до пятниці. Семінары будут ведены нажыво на плятформі ZOOM, а участны будут мати можніст давати звіданя ведучым презентациі. Вшыткы презентациі будут награны і пак опубликуваны в сервісі YouTube. Участ в семінарах єст безплатна, а в тым році не єст вымагана реґістрация. В проґрамі: семінар др Патрициі Крафцік пн. «Нетиповы братя: карпатскы гірскы збійникы і американьскы супергероі», Річард Кастер оповіст про ідентифікацию серед американьскых Карпаторусинів, др Нік Купеньскій буде мал презентацию пн. «Штука одроджыня угльового реґіону: маляр Антоний Кубек», Михал Шымко оповіст о лемківскым кумшті як артефакті памяти. Серед презентуючых є і редакторка нашого радия Анна Масляна, докторантка Ягайлоньского Універсетету, яка выступит в пятницю, 2. вересня/септембра, з доповідю пн. «Лемківскій язык як антидот».

Бєщады получат з біциґльовым шляком Green Velo

З огляду на розвиваючу ся туристику Бєщады мают быти получены зо східнім біциґльовым шляком Green Velo. Влони зачало ся опрацовуваня проєктовой документациі для поєдных одтинків трасы. Технічну і проєктову документацию розбудовы сіти туристичных біциґльовых трас на обшыри Бєщадів і влучыня іх до біциґльового шляку Green Velo рыхтує Підкарпатскій Заряд Воєвідскых Доріг в Ряшові. Проєктовый етап робіт має быти завершеный в тым році. За авторами проєкту, з причыны збільшаючого ся туристичного руху в Бєщадах, в тым розвиваючой ся біциґльовой туристикы, треба створити передуману і упорядкувану головну роверову трасу той обшыри. Проєктувана траса буде ішла з Перемышля до Майдану. Частично траса буде ішла вздолж воєвідской дорогы нр 896 Устричы Нижні – Чарна – Устрикы Выжні і вздолж воєвідской дорогы нр 897 Тылява – Команча, Радошыці, Тисна, Устрикы Выжні – Волосате – границя державы. Інвестиция єст фінансувана з середків міністра фондів і реґіональной політикы (5 млн злотых) і самоурядовых єдиниц (понад піл млн злотых). Біциґльовый шляк Green Velo лучыт пят східніх воєвідств: підляшскє, свєнтокшыскє, варміньско-мазурскє, люблиньскє і підкарпатскє.

Дальшы літні стрічы в Маґурскым Нацийональным Парку

На конец літніх вакаций Маґурскій Нацийональный Парк просит на дальшы літні стрічы. Як кажду вакацийну середу на діти ждут природничы варштаты в Едукацийно-Музейным Осередку МНП в Крампній, на якы треба ся перше записати. Для дорослых і родин Парк зрыхтувал чергову прогульку по парку, яка рушыт в тот четвер о 10.00 год. з Розстайного. Додатково парковый едукатор буде присутный на трасі Розстайне – Чарне – Вышоватка в год. од 10.00 до 14.00. Участ в активностях єст безплатна, але тоты, што ідут на прогульку до Парку, мусят заплатити вступне.

Тырват першый етап конкурсу «Туристичны Скарбы Малопольщы»

Іщы до кінця того місяця мож зголошувати кандидатуры до четвертой едициі конкурсу «Туристичны Скарбы Малопольщы». Його цілю єст нагородити найбарже атракцийны, новаторскы і приязны для туристів місця. На сайті Малопольского Воєвідства находит ся анкєта, через котру мож зголосити кандидата, та цілый реґулямін і вымогы, котры мусит сполняти. Як і в попередніх роках, змаганя пройдут в 6-ох катеґориях: місце з климатом, найбарже інтересуючый туристичный пут, подія, унікатова туристична атракция, одпочынок на селі і в гостині.