Сумар дня на 23. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 23. серпня/авґуста 2022 р.

З Ґорлиц вывезут близко 8 тисячів тон токсичных одпадів
Близко 75 млн злотых то цілковитый кошт ліквідациі одпадів з обшыри бывшой Рафінериі Нафты Ґлімар в Ґорлицях. Кінцьом 2021 р. з бывшой рафінериі вывезено пят тисячів тон складаных там токсичных одпадів, котры были одповідньо забезпечены. Тепер вывезти мают наступны понад два і піл тисяча тон. Як і в посліднім році, більшіст коштів покрыют дотациі з Державного Фонду Охороны Середовиска і Заряджаня Водныма Ресурсами в Варшаві. Жебы старчыло пінязів, конечна єст іщы пожычка в высокости штырьох млн злотых і близко мілийон з буджету міста. Справом пожычкы займут ся радны в часі найблизшой Рады Міста. В першым етапі ліквідациі токсичных одпадів Фонд передал самоурядови на тоту ціль 40 млн злотых, што так само вязало ся з потребом пожычкы в квоті 8 млн злотых, яку місто буде сплачало до 2034 рока. Самоуряд може ся старати скасувати обі пожычкы по сплачыню 75% капіталу, першой в квоті 350 тис., і другой в квоті 250 тис. злотых. За заступцьом бургомайстра Ґорлиц, мают надію, же на конец грошы поведе ся одзыскати од орґанізаторів нелеґалього складу одпадів. Дальшым проблемом по закінчыню ліквідациі одпадів остає процес рекультивациі обшыри, до якой місто не має права власности.

Неодолга зачнут будову спацеровой стежкы на трасі Сяры – Рыхвалд

В рамках дальшых діянь в проєкті про трансграничну спілпрацу Санкова – Стропків – Бобова – Нижня Полянка неодолга має быти зреализувана будова понад двокілометровой спацеровой стежкы. Буде ся она находила в рамах повітовой дорогы нр 1493K Сяры – Рыхвалд. Догваріня з выконавцьом робіт ґміна Санкова підписала 12. серпня/авґуста. Проєкт єст спілфінансуваны в рамках Проґраму Трансграничой Спілпрацы Інтерреґ Польща – Словация 2014-2020. Цілковитый кошт задачы то понад 2 млн 600 тис. злотых. Ґміна Санкова, в рамках реализациі проєкту Санкова, Стропків, Бобова, Нижня Полянка – Зміцніня трансграничной спілпрацы в обшыри культурово-природничой спадковины, зачала і працы при будові парку рекреациі в Сярах, де ся окрем інчого буде находило едукацийне ґратя в обшыри істориі і сенсорикы.

Серіґрафікы і рисункы авт Енді Варголя на выставі в Лос Анджелес

Од кінця липця/юлия тр. в Petersen Automotive Museum в Лос Анджелес мож обзерати выставу пн. «Енді Варголь: Cars – працы з колекциі Mercedes-Benz Art Collection». Мож на ній видіти 27 серіґрафік на полотні і 13 рисунків. До двоіх прац король поп-арту схоснувал 8 выбраных моделів авт, найстаршый з 1886 р. і наймолодшый з 1970 р. Серия Cars то єдна з остатніх ґруп прац Енді Варголя перед його смертю в лютым/фебруарі 1987. Артиста створил ю на зламі 1986 і 1987 рока для фірмы Daimler–Benz AG, з нагоды 100. річниці возникніня авта. На початку плянуваных было 80 прац вказуючых 20 моделів з 8 ріжных декад, але фінально створеных было лем 36 серіґрафік і 13 рисунків. Выставу в Лос Анджелес мож буде обзерати до 22. січня/януара будучого рока.

Уж неодолга в Чмелю одбуде ся «Лемківскє Літо»

Православна парохія св. Тройці в Любіні просит на шторічну подію під назвом «Лемківскє Літо», яка орґанізувана єст в Чмелю на Нижнім Шлеску. Подія одбуде ся 3. вересня/септембра на місцевым рекреацийно-спортовым пляци. В проґрамі окрем концертів сут конкурсы, забавы про діти і лемківска кухня. В пляні сут і дітячы рецитаторскы, вокальны і танцювальны выступы наймолодшых Лемків. Подія одбыват ся в селі, в якым прожыват вельох Лемків, головно уж потомых выселеных з Білцаревы. Все традицийом є, што вчас подіі при поблизкым кресті одбыват ся наше богослужыня.