Ґрекокатолицька харіта Пряшів розшырила службы на поміч одыйдженым із Україны. Як інформовала аґентура TASR, у віторок 23-го авґуста 2022-го року одкрыла в Пряшові на Сабіновскій уліці, в будові бывшого Готела Шаріш, центер підпоры.
Харіта в нім буде забезпечовати соціалну поміч, адміністратівну підпору, освіту, вольночасовы актівности, гуманітарну поміч і допроводжіня.
„До нашого цента можуть приходити одыйджены з Україны, находять ту різну поміч. Наприклад собі ту можуть написати свою біоґрафію, і наслідно глядати роботу на Словакії. Так само можуть прийти по гуманітарну поміч, ці потравины або гіґієнічны потребы. Можуть ся ту учіти словацькый язык, здобывати фінанчну освіту, а понукаме і вольночасовы актівности,“ повів ведучій центра Штефан Пацак з тым, же про одыйдженых будуть орґанізовати і творчі варштаты.
Центер підпоры буде помагати людям з Україны і в припаді потребы транспорту за лікарьом, на уряды і так подобно.
Як повів директор Ґрекокатолицькой харіты Пряшів Петро Валічек, одыйджены потребують ся інтеґровати, і кедь їх із Україны вже приходить менше. За його словами люди теперь уж приходять скоріше індівідуално, на другім боці є потрівбным, жебы тоты, котры пришли, мали в рамках комунітного фунґованя легшу інтеґрацію.
Одкрытя центра підпоры проходило за участи владыкы Петра Руснака, апостольского адміністратора Пряшівской архієпархії, представителів Уряду Пряшівского самосправного краю і міста Пряшів. Владыка Петро посвятив просторы нового центра.
Центер підпоры Ґрекокатолицькой харіты Пряшів є частьов сполочного проєкту окремых дієцезных, архідієцезных і єпархіалных харіт на Словакії під покровительством Caritas Slovakia.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА