Сумар дня на 18. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 18. серпня/авґуста 2022 р.

Стрічы з Лемківском Культуром в Ґожові

В найблизшу суботу, 20. серпня/авґуста, в Ґожові Великопольскым одбудут ся ХХVIII Стрічы з Лемківском Культуром, якы орґанізує місцевый Кружок Стоваришыня Лемків. Подія од років проходила осіню в ґожівскым театрі, но тым разом одбуде ся она літом в рамках шыршой акциі Dobry Wieczór Gorzów 2022. Вчас концерту на ґожівскым рынку выступлят Лемківскій Ансамбль Пісні і Танця «Кычера» з Ліґниці, ґрупа Русин Чендеш Оркєстра з Пряшівской Руси та ансамбль Бурян з Лемковины (Ґорлиці). XXVIII Стрічы з Лемківском Культуром одбудут ся завдякы дотациі Міністерства Внутрішніх Справ і Адміністрациі та Уряду Міста Ґожова Великопольского. Подія зачне ся о 19.00 год. На акцию просит ведучый Головного Заряду Стоваришыня Лемків Андрий Копча і ведучый Кружка Стоваришыня Лемків в Ґожові Йоан Ґаборек.

В Чертіжным припомнут выдатных жытелів села

Так само в суботу, 20. серпня/авґуста, в Чертіжным на Пряшівскій Руси в рамках Реґіональных Дни Русиньской Культуры одбуде ся чествуваня русиньскых вызначных діячів. Орґанізаторы будут споминати на Адольфа Добряньского і Іринея Ханата. Зобраным припомнены будут біоґрафіі обох осіб. В дальшій части подіі одслужат заупокійны богослужыня – грекокатолицку панахіду на гробі Добряньского і православну на гробі Ханата. На подію просит м.ін. Русиньска Оброда на Словациі.

Лемківскє Літо початком вересня/септембра

Православна парохія св. Тройці в Любіні просит на шторічну подію під назвом «Лемківскє Літо», яка орґанізувана єст в Чмелю на Нижнім Шлеску. Подія одбуде ся 3. вересня/септембра на місцевым рекреацийно-спортовым пляци. Од парох років в «Лемківскым Літі» участ берут не лем самы Лемкы, але і польскы сусіды. В проґрамі подіі окрем концертів запрошеных ансамблів сут конкурсы, забавы про діти, лемківска кухня. В пляні сут і дітячы рецитаторскы, вокальны і танцювальны выступы наймолодшых Лемків. Імпреза дофінансувана єст з середків Міністерства Культуры і Нацийональной Спадковины. «Лемківскє Літо» одбыват ся в селі, в якым прожыват вельох Лемків, головно уж потомых выселеных з Білцаревы. Все традицийом є, што вчас подіі при поблизкым кресті одбыват ся наше богослужыня.

В Сербіі бесідували о Акчным Пляні

В пятницю, 12. серпня/авґуста, в бельградскым Палаци Сербія, котрый є будовом Міністерства Про Людскы Права, Права Меншын і Социяльный Діалоґ, одбыло ся четверте засіданя робочой ґрупы, яка має выпрацувати пропозицию Акчного Пляну Про Творіня Прав Нацийональных Меншын. Окрем членів робочой ґрупы, котры сут з нацийональных совітів окремых меншын в Сербіі, в засіданю участ брали і представникы міністерияльных ресортів, Орґанізациі про Безпеку і Спілпрацу в Европі, як і експерты Рады Европы, котрым была робоча версия тексту Акчного Пляну доручена до консультациі. Робоча версия достала вісем пропозиций, головно з боку представників нацийональных совітів. Бесідувало ся і о проблемі підручників в языках нацийональных меншын. Як на засіданю припомянула сербска міністерка про людскы і меншыновы права Ґордана Чоміч, Акчный Плян вказує, же власти занимают ся охороном меншыновых прав і іх поправом.