Сумар дня на 17. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 17. серпня/авґуста 2022 р.

Одкличут воєводів?

Партия Зелены жадат одкликати воєводів пятьох воєвідств: шлезского, опольского, нижньошлезского, любушского і західньопоморского. До премєра Матеуша Моравєцкого і шефа Міністерства Внутрішніх Справ і Адміністрациі Мариюша Каміньского в понедільок, 15. серпня/авґуста, Паритя Зелены зложыла внесок одкликати выміненых воєводів. Арґументуют своє жаданя тым, што мали нарядя, жебы в пору затримати отрую, што розляля ся на цілу західню Польщу. Ведуча Партиі Зеленых повіла, што і премєр мал до диспозициі Урядовый Центр Безпекы, значыт структуру і систем створеный про тото, жебы не допущати до криз, а в разі іх явліня мінімализувати наслідства, а протягом 17 днів не зробили нич. Першы інформациі о мертвых рыбах в Одрі в Олаві явили ся 25. липця/юлия, з дня на ден было іх штораз веце. Інституциі на ситуацию зачали реаґувати аж 11. серпня/авґуста. Дотепер не рішено, што затруват рыбы, ани хто спричынил катастрофу. З рікы фурт вытігают тоны затрутых рыб (то уж близко 60 тон), падают тіж інчы звірята, в тым птахы.

Консультациі в Ропі

Стоваришыня Локальна Ґрупа Діяня «Ґорлицкій Бескід» просит жытелів ґміны Ропа до участи в соспільных консультациях, што тыкают опрацуваня Локальной Стратеґіі Розвитку на рокы 2023-2027. Стріча в формі стратеґічного варштату пройде 24. серпня/авґуста в год. 12-14 в світлици в будинку Уряду Ґміны в Ропі. Вчас стрічы омовлят головны приметы підходу LEADER в будуваню стратеґіі, проведут анализу потенциялу і розвитковых потреб ґміны, дефаворизуваных ґруп, тіж плянуваных ініциятив і кінцьовых ціли. Локальна Ґрупа Діяня послужыт як нарядя для позыскуваня середків презначеных на розвиток сельскых обшыри ґорлицкого повіту.

МНБ в Саноку без директора Ґінальского

Єжы Ґінальскій по 23 роках кєруваня Музейом Народного Будівництва в Саноку переходит на емеритуру, на котру высылат го заряд підкарпатского воєвідства. Не передолжыли му контракту, хоц директор Ґінальскій задеклярувал охоту дальшой роботы. Заряд воєвідства не прихылил ся ани до петициі підписаной робітниками Музею, жебы передолжыти контракт Ґінальскому, не помогло тіж схваліня Рады Музею направлене до маршалка воєвідства, в котрым внескували покликати Ґінальского на становиско директора на дальшы, найменше 3 рокы, жебы «заґарантувати інституциі дальшый, незаколоченый розвиток, а тіж дозволити закінчыти зачаты інвестициі» – як мож прочытати в 2 параґрафі схваліня. Становиско заряду є єднак ясне. Конкурсове поступуваня зачне ся в вересни/септембрі 2022 рока, передвидуваный термін закінчыня то листопад/новембер. Директор Ґінальскій подал, што не выстартує в конкурсі.

Яр Гомоле з Пінезком од Google

Пятнадцет нацийональных і краєвидовых парків та резерватів природы остало лавреатами Золотых Пінезок. Google признає тото выріжніня на основі опіній хоснувателів мап. В малопольскым воєвідстві выріжніня отримал м.ін. Яр Гомоле, што находит ся на Шляхтівскій Руси. Была то друга едиция проєкту. Два рокы тому, з нагоды 15. уродин Google Maps, нагородили 16 туристичных атракций – по єдній в каждым з воєвідств. Штоденно на Google Maps публикуваных є веце як мілийон опіній. Протягом послідніх трьох років чысло рецензий, оцін, знимок додаваных до Google Maps звекшыло ся двараз. Того рока аж 5 з 15 Золотых Пінезок признали місцям в Малопольщы, єдным з них є споминаный Резерват Природы Яр Гомоле, што находит ся на обшыри села Явіркы. Його обшыр то нецілых 59 га, сам яр має долгіст 800 м і в своій скалистій части творит глубокій каньон з барз спадистыма убочами, што доходят до 120 м высокости. Середньовічны переказы бесідуют, же деси гын схованый є скарб…