В Белеграді обговорили акчный план про права меншын

Як інформовала аґентура Рутенпрес, в пятніцю 12-го авґуста 2020-го року в белеградьскім Палаці Сербія, котрый є будовов Міністерства про людьскы права, права меншын і соціалный діалоґ, одбыло ся четверте засіданя робочой ґрупы, яка має выпрацовати пропозіцію Акчного плану про творіня прав народностных меншын.

Окрім членів робочой ґрупы, котры суть з націоналных совітів окремых народностных меншын в Сербії, были на засіданю участны і представителі міністерскых резортів, Орґанізації про безпечность і співпрацу в Европі, як і експерты Рады Европы, котрым была робоча верзія тексту Акчного плану доручена на проштудованя.

Робоча верзія дістала вісем припоминок, пропозіцій, головно з боку представителів націоналных совітів, і односять ся на области освіты і културы. Припомінкы мали представителі хорватьской, босняньской і мадярьской народностной меншыны.

Як інформовав Рутенпрес, дакотры з них не мож процедурално рішыти подля законів. Но што до освіты рішыло ся, же в припаді школярів, котры хотять учіти ся на материнськім языку, буде дозволене зменшыти квоту, котра є потрібна на формованя одділіня, яке в материньскім языку даной меншыны буде навчати. Така практіка была запровадена і дотеперь.

Говорило ся і о проблемі учебників в языках народностных меншын, котры пізнять з причіны лоґістічных недостатків теперішнього выдавателя, котрым є Центер про выдаваня учебників малых тіражів. На робочім засіданю запропоновало ся, жебы в слідуючім періоді учевник друковав Завод про выдаваня учебників Войводины, кедьже має в такых справах веце практікы.

Як на засіданю припомянула міністерка про людьскы і меншыновы права Ґордана Чоміч, Акчный план вказує, же влада занимать ся охоронов меншыновых прав і їх зліпшованьом.  Акчный план має быти документом, котрый ясно вкаже напрямы діялности в слідуючіх двох роках.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА