«Слово» – 9-та неділя по Сошествії Святого Духа – неділя, 9.00 год.

Ісус Хрістос по розмножіню хлібів посылать своїх учеників, жебы ся переплавили на другый берег. Потім одышов помолити ся на гору. Видів, як тажко ся їм ішло, дув силный вітор.

Так о четвертій тражі ночі приходить ку ученикам, ідучі по морі. Ученикы сі наперед думали, же то якесь привиджіня і од страху закричали.

Ісус ся такой озвав: То єм я, не бійтеся. Но Петро зареаґовав: Кедь то ты, розкаж мі прийти ку тобі по воді. А Ісус: Подь. А Петро справды вшов із лоьдкы і ішов ку Ісусови. Но кедь видів силны волны і вітор, його віра зачала слабнути, а він ся зачав топити.

Ісус му такой подавать руку і піднимать руку а говорить му: Чом єсь не мав твердой віры? В ґреческім техті є слово distas – розділена мысель. Чом єсь мав розділену мысель?

А ту є головный одказ днешньому слову: Жебы слухати голос Хріста, смотрити духовныма очами на Нього, і не слухати іншый голос. Покы Петро слухав голос Хріста, доты ішов по воді. Як прислухав ся іншому голосу, тогды ся топив. Слава Ісусу Хрісту!

В неділю, 14. авґуста 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 14. авґуста о 12.00 год. і 15. авґуста о 2.00 год. за русиньскым часом.